Üç və daha çox uşaqlı ailələrə sosial dəstək proqramlarının həyata keçirilməsinə böyük ehtiyac var".
Xezerxeber.az xəbər verir ki, bunu 2026-cı ilin dövlət büdcəsinin müzakirəsi zamanı parlamentin Ailə, qadın və uşaq məsələləri komitəsinin sədri, deputat Hicran Hüseynova deyib. O, bildirib ki, bu istiqamətdə beynəlxalq təcrübəni öyrənmək lazımdır.
Dövlət Sosial Müdafiə Fondunun və İşsizlikdən Sığorta Fondunun 2026-ci il üçün büdcə layihələrinin müzakirəsi zamanı isə Əmək və Əhalinin Sosial Müdafiəsi naziri Anar Əliyev bildirib ki, 2026-cı ildə İşsizlikdən Sığorta Fondunun vəsaiti hesabına 450 minə yaxın şəxsin aktiv məşğulluq tədbirlərinə cəlb olunması gözlənilir. Nazir əlavə edib ki, orta pensiya məbləğinin artaraq 590 manata, yaşa görə pensiyanın məbləğinin isə 629 manata çatması proqnozlaşdırılır
Müzakirələr zamanı üç və daha çox uşağı olan analara erkən, güzəştli şərtlərlə pensiyaya çıxmaq hüququnun verilməsi təklif olunub. Deputat Əli Məsimli bildirib ki, bu kontekstdə 5 və daha çox uşağı olan analar bu hüquqdan istifadə edə bilir. O təklif edib ki, bu, üç və daha çox uşağı olan analara da şamil edilsin.
Deputat Razi Nurullayev isə qeyd edib ki, büdcə layihəsində sosial paket normaldır, artımlar nəzərdə tutulub. Amma bu artımlar insanların minimal yaşayış tələbləri və real inflyasiya fonunda əhəmiyyətini itirir. Çünkü qiymətlər sürətlə artır.
İclasda həmçinin təklif edilib ki, əgər vətəndaş pensiyaya çıxan zaman və ya çıxmamışdan dünyasını dəyişibsə, onun pensiya kapitalının vərəsələrə verilməsi istiqamətində qanunvericiliyə dəyişiklik edilsin.
Xezerxeber.az mövzu ilə bağlı daha ətraflı videomaterialı təqdim edir.
