Gəncə Apellyasiya Məhkəməsində səhlənkarlıqda təqsirləndirilən Nəbi Balayevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Nural Əliyevin sədrliyi ilə keçirilən prosesdə qərar elan olunub.
Qərara əsasən, apellyasiya şikayəti qismən təmin edilib, Şəmkir Rayon Məhkəməsinin hökmü təqsirləndirilən şəxsin cəzaya aid hissədə dəyişdirilib. Ona 2 il 6 ay müddətinə azadlığın məhdudlaşdırılması (elektron qolbaq) cəzası təyin edilib.
İttihama görə, Nəbi Balayev Şəmkir rayonu Dəllər qəsəbə Mənzil İstismar Müəssisəsinin rəisi vəzifəsində çalışdığı 06 sentyabr 2019-cu ildən indiki dövrədək vəzifəli şəxs kimi üzərinə düşən xidməti vəzifələri lazımi qaydada yerinə yetirməyib. Ona mənzil fondunun düzgün texniki istismarını və təmirini təmin etmək, həmçinin müəssisənin balansında olan yaşayış binalarının tüstü bacalarının və havalandırma xətlərinin mütəmadi müayinəsini təşkil etmək vəzifəsi həvalə olunsa da, adı çəkilən tələblərə əməl etməyib.
Belə ki, təqsirləndirilən şəxs müvafiq tələblərə əsasən, Dəllər qəsəbəsində yerləşən ikimərtəbəli yaşayış binasının tüstü bacasının ildə ən azı bir dəfə müayinə olunmasını və mövcud nöqsanların aradan qaldırılmasını təmin etməli olduğu halda, bunu etməyib.
Nəticədə 09 aprel 2024-cü il tarixdə, saat 10 radələrində həmin binanın damında su borusunu təmir edən, 1970-ci il təvəllüdlü zərərçəkmiş S.S. (adı, soyadı şərtidir) tüstü bacasının üstünün bağlanması səbəbindən qaz cihazlarının yanma məhsullarının dam sahəsinə dolması nəticəsində dəm qazından zəhərlənərək hadisə yerində vəfat edib.
Cinayət materiallarında qeyd edilib ki, təqsirləndirilən şəxsin işinə vicdansız və laqeyd münasibət göstərərək üzərinə düşən xidməti vəzifələri lazımi qaydada yerinə yetirməməsi zərərçəkmiş şəxsin ölümünə səbəb olub, bu isə onun ehtiyatsızlıqdan ölümlə nəticələnən səhlənkarlıq cinayətini törətməsini təsdiq edir.
Şəmkir Rayon Məhkəməsinin hökmü ilə Nəbi Balayev cəzasını məntəqə tipli cəzaçəkmə müəssisələrində çəkməklə 2 il 6 ay müddətə azadlıqdan məhrumetmə cəzasına məhkum edilmişdi.
Kamal Məmmədov
