Kreml Ukraynanın mülki enerji infrastrukturunu məqsədli şəkildə hədəfə alır. Müharibə boyunca davam edən bu hücumlar indi, qışın sərt soyuqları yaxınlaşdıqca daha da amansız xarakter alıb.
Musavat.com xəbər verir ki, Böyük Britaniya Ukraynaya 13 milyon funt sterlinq məbləğində yardım ayıraraq enerji obyektlərinin bərpasına dəstək verir.
Londondan verilən açıqlamaya görə, bu vəsait elektrik, istilik və su təchizatının bərpası üçün xərclənəcək, xüsusilə də qışda enerjisiz qalan evlərə, xəstəxanalara və məktəblərə yönəldiləcək.
Bundan əlavə, Böyük Britaniya Rusiyanın hərbi və enerji sektoruna qarşı yeni sanksiyalar elan edib. Bu tədbirlər çərçivəsində Rusiya maye qazının (LNG) daşınması üçün Britaniya dəniz xidmətlərindən istifadəyə qadağa qoyulur, həmçinin “Rosneft” və “Lukoyl” kimi iri enerji şirkətlərinin fəaliyyətinə məhdudiyyətlər davam etdiriləcək.
Britaniyanın xarici işlər naziri İvett Kuper bəyan edib: “Putin qış yaxınlaşdıqca Ukraynanı qaranlıq və soyuğa qərq etməyə çalışır. Bu qorxaq hücumlar təkcə Ukraynanın təhlükəsizliyinə deyil, həm də qlobal iqtisadi sabitliyə təhdiddir. Biz G7 formatında vahid cəbhə kimi çıxış edərək Ukraynanın yanındayıq və dünyanı bu sınaqlardan çıxarmağa sadiqik".
Musavat.com
