Gununsesi portalından alınan məlumata görə, ain.az xəbər verir.
Beynəlxalq Sülh və Rifah naminə Tramp Marşrutunun (TRIPP) Sünik (Zəngəzur – red) hissəsinin tikintisinə 2026-cı ilin ikinci yarısında başlanacaq.
Bu barədə Ermənistanın baş naziri Nikol Paşinyan parlamentdə hökumət saatı zamanı məlumat verib. Onun sözlərinə görə, ilin sonuna qədər layihənin icra planı hazırlanacaq və bütün detalları açıqlanacaq. Sənədin 2026-cı ilin birinci yarısında təsdiqlənməsi nəzərdə tutulur.
Paşinyan əlavə edib ki, ABŞ Prezidenti Donald Trampın komandası hazırda Yaxın Şərqdəki digər layihələrlə məşğuldur və yüklənib, lakin Ermənistan müəyyən edilmiş qrafikə əməl etməyə çalışacaq.
Sözügedən layihə region üçün hansı iqtisadi və siyasi faydaları gətirə bilər?
Mövzu ilə bağlı millət vəkili Fariz İsmayılzadə Gununsesi.info-ya açıqlamasında bildirib ki, layihə region üçün həm iqtisadi, həm də siyasi baxımdan mühüm əhəmiyyət daşıyır:
“Bu layihə regionumuza həm iqtisadi, həm də siyasi dividendlər gətirəcək. Zəngəzur dəhlizinin yaranması ilə Azərbaycan Türkiyəyə birbaşa çıxış əldə edəcək və vacib tranzit ölkəyə çevriləcək. Orta Asiya məhsulları bu yolla Avropaya daşına bilər. Azərbaycan Avrasiyada strateji nəqliyyat mərkəzinə çevriləcək. Eyni zamanda, ‘Tramp marşrutu’ bölgədə sülhün və sabitliyin möhkəmlənməsinə ciddi təkan verəcək.”
Deputat qeyd edib ki, layihə regionun inkişafına və dayanıqlı sülhün təmin olunmasına geniş imkanlar açacaq.
Gununsesi.info
Ən son xəbərləri və yenilikləri almaq üçün ain.az saytını izləyin.
