Ankara, 12 noyabr, AZƏRTAC
Gürcüstan-Azərbaycan sərhədi yaxınlığında Türkiyə Hərbi Hava Qüvvələrinə məxsus C130 hərbi-nəqliyyat təyyarəsinin qəzaya uğraması nəticəsində iyirmi hərbçi həlak olub.
AZƏRTAC xəbər verir ki, bu barədə noyabrın 12-də Türkiyə Milli Müdafiə Nazirliyi məlumat yayıb.
Nazirlik sosial mediada qəza qurbanlarının adlarının siyahısını bu sərlövhə ilə paylaşıb: “Vətən sizə minnətdardır!”.
Türkiyənin milli müdafiə naziri Yaşar Güler şəhidlərin ailələrinə və yaxınlarına başsağlığı verib.
“Qəhrəmanlarımız 11 noyabr 2025-ci ildə Gürcüstan-Azərbaycan sərhədi yaxınlığında C130 hərbi- nəqliyyat təyyarəsinin qəzaya uğraması nəticəsində həlak olublar. Öz adımdan və Türkiyə Silahlı Qüvvələri adından başsağlığı verirəm və qurbanların ailələrinə, bütün türk xalqına səbir diləyirəm”, - deyə Güler paylaşımda bildirib.
Türkiyə Prezidenti Rəcəb Tayyib Ərdoğan bundan əvvəl təyyarə qəzası yerində axtarış-xilasetmə əməliyyatlarını müzakirə etmək üçün Gürcüstanın Baş naziri İrakli Kobaxidze ilə telefon danışığı aparıb.
Bu arada, Türkiyə Müdafiə Nazirliyi hərbi mütəxəssislərin 12 noyabr səhər saat 6:30-da qəza yerində işə başladığını bildirib.
Ramin Abdullayev
AZƏRTAC-ın xüsusi müxbiri
Ankara
