Qaynarinfo portalından verilən məlumata əsasən, ain.az bildirir.
Böyük Britaniyanın "The Telegraph” nəşrinin şərhçisi Xemiş de Bretton-Qordonun fikrincə, ölkənin və NATO-nun Avropadakı müttəfiqləri ilə birlikdə Rusiya ilə "hibrid müharibə” vəziyyətində olması artıq danılmaz faktdır.
Qaynarinfo-nun məlumatına görə, məqalədə bildirilir ki, Britaniya Hərbi Hava Qüvvələrinin (RAF Regiment) hərbçilərinin Belçika hökumətinə hava məkanını, hava limanlarını və strateji əhəmiyyətli infrastruktur obyektlərini Rusiya dron hücumlarından qorumaqda yardım məqsədilə göndərilməsi bu vəziyyətin ən açıq göstəricisidir.
Nəşrin məlumatına görə, dronların son aktivliyi hələ tam sübuta yetirilməsə də, bunun Kremlin nəzarəti altında baş verdiyi ehtimal olunur və bu, Rusiyanın "boz zona” və ya "hibrid müharibə” adlanan metodlarına tam uyğundur.
Şərhçi qeyd edir ki, RAF polkunun əsas vəzifəsi hava bazalarını, müasir texnologiyalı təyyarələri və pilotları qorumaqdır. Bu baxımdan onların Avropada yerləşdirilməsi məqsədəuyğun hesab olunur. Hərbçilərin arsenalında həm "sərt zərərsizləşdirmə” üsulları — dron və raketlərin fiziki məhv edilməsi, həm də "yumşaq” müdafiə üsulları — radioelektron mübarizə və saxta hədəflərdən istifadə kimi vasitələr var.
Yeni "soyuq müharibə”
Britaniyanın sabiq kəşfiyyat rəhbərləri — MI5-in keçmiş rəhbəri Eliza Menninqem-Buller və MI6 əməkdaşları bildiriblər ki, yeni "soyuq müharibə” getdikcə qızışır. Onların fikrincə, Rusiya hazırda Qərbə, xüsusən də Avropa və Böyük Britaniyaya qarşı açıq şəkildə hibrid müharibə aparır. Ölkə uzun illərdir diversiya, sabotaj və casusluq cəhdlərinin hədəfindədir.
Bretton-Qordon xatırladıb ki, "Novichok” maddəsinin istifadə edildiyi Solsberi hadisəsi təkcə Kremlin müxaliflərinə qarşı sui-qəsd cəhdi deyil, həm də minlərlə insanın həyatını təhlükəyə atan açıq terror aktı idi.
O, qeyd edib ki, Rusiya ordusunun Ukrayna cəbhəsində kimyəvi silahlardan istifadə etməsi gələcəkdə bu cür hücumların daha geniş miqyasda təkrarlanması riskini artırır. "Xoşbəxtlikdən, Belçikadakı missiya göstərir ki, Britaniya ən azı bəzi ssenarilərə hazırdır, baxmayaraq ki, hamısına yox", deyə o bildirib.
Şərhçi vurğulayıb ki, Rusiyada "məğlubedilməz Qırmızı Ordu” mifi artıq dağılır. Ukrayna ordusu və xüsusi xidmətlərinin həyata keçirdiyi dron zərbələri Rusiyanın daxili infrastrukturuna ciddi zərbə vurur və bu, Kreml rejimini getdikcə daha çox təzyiq altında saxlayır.
"Dronlar müasir müharibənin universal valyutasına çevrilib. Onları kim idarə edirsə, döyüş meydanına və nəticəyə də nəzarət edir", deyə müəllif əlavə edib.
Onun sözlərinə görə, hibrid müharibə yalnız döyüş meydanında deyil, həm də sosial şəbəkələrdə, informasiya məkanında və hətta dinc həyatın bütün sahələrində aparılır. Lakin istənilən təhlükə, yetərli resurs və koordinasiya ilə azaldıla bilər.
"Avropada hərbi imkanların dirçəlişi müşahidə olunur. Qərb ölkələri birgə bilik və resurslarını birləşdirərək Putinin hibrid müharibə taktikasını öz əleyhinə çevirə bilər. Amma bu hibrid dövrdə bir şey aydındır: müharibə artıq qapımızdadır, bəzi hallarda isə içərimizdədir", deyə Bretton-Qordon yekunlaşdırıb.
Aydın
Hadisənin gedişatını izləmək üçün ain.az saytında ən son yeniliklərə baxın.
