...Televiziya aparıcısı və həkim Aleksandr Myasnikov ABŞ prezidenti Donald Trampın hamiləlik dövründə parasetamol qəbul etməyin uşaqda autizmə səbəb ola biləcəyi iddiasına münasibət bildirib.
SİA-nın məlumatına görə, həkim bu açıqlamanı “Rossiya 1” kanalındakı “Ən vacib şey haqqında” verilişində verib.Myasnikov qeyd edib ki, Amerika liderinin iddiasında elmi dəlil yoxdur. Həkimin sözlərinə görə, parasetamol ən təhlükəsiz qeyri-steroid iltihab əleyhinə dərman olaraq qalır və tibbi göstəriş olduqda hamiləlik dövründə istifadəsinə icazə verilir.
O, ananın dərman istifadəsi ilə uşaqda autizmin inkişafı arasında heç bir əlaqənin müəyyən edilmədiyini izah edib. Lakin həkim dərmanın lazımsız yerə qəbul edilməməsi ilə razılaşıb.
O, Trampın dozaların monitorinqinin və dərmanın yalnız həqiqətən ehtiyac olduqda təyin edilməsinin vacibliyi barədə mesajını dəstəkləyib.
Myasnikov vurğulayıb ki, dozanın aşılması təhlükəlidir. …Qaraciyər xəstəliyi olan bir şəxs dörd qramdan çox parasetamol qəbul edərsə, orqanın özü zədələnə bilər, - deyə həkim izah edib.
O, ötən il ABŞ-da parasetamol və parasetamol əsaslı dərmanlar üçün 130 milyon reseptin yazıldığını göstərən məlumatlara istinad edib.
Bunlardan təxminən 6 faizi təhlükəsiz limitdən yuxarı dozaları ehtiva edirdi ki, bu da həkimin sözlərinə görə, "76.000 insanın həyatını təhlükəyə atıb".
Xatırladaq ki, daha əvvəl Donald Tramp hamilə qadınların aktiv tərkib hissəsi parasetamol olan ağrıkəsici Tylenol qəbul etməkdən çəkinməli olduqlarını bildirmişdi. O, dərmanın uşaqların autizmlə doğulması riskini artırdığını iddia etmişdi. Bu iddia sonradan tibb ictimaiyyətinin nümayəndələri tərəfindən təkzib edilmiş və klinik tədqiqatlarda belə bir məlumatın olmadığını qeyd etmişdi.
Nazlı Almuradova
