OpenAI şirkəti ABŞ hökumətindən 1 trilyon dollarlıq kreditlərə dövlət zəmanəti verilməsini xahiş edib. Barron’s yazır ki, bu addım süni intellekt infrastrukturunun genişləndirilməsi üçün nəzərdə tutulub. Şirkətin maliyyə direktoru Sara Frayer, The Wall Street Journal biznes-konfransında çıxışı zamanı, bu qərarı belə izah edib:
“Biz banklar, özəl kapital və, bəlkə də, dövlətin iştirakını nəzərdə tutan bir ekosistemi dəyərləndiririk”, – deyə o bildirib.
Frayer qeyd edib ki, dövlət zəmanəti maliyyələşmə dəyərini əhəmiyyətli dərəcədə azaldacaq, bu da OpenAI və onun investorlarına daha aşağı faizlə daha çox vəsait cəlb etməyə imkan verəcək.
Barron’s yazır ki, bu yanaşma Silikon Vadisi üçün qeyri-adi olsa da, nəzəri cəhətdən dövlətin dəstəyi şirkətin borclanma xərclərini azalda bilər. Belə halda defolt riski dövlət büdcəsinə keçəcək, bu isə bir çox bankların və maliyyə institutlarının yüksək riskli kreditlər verməsinə şərait yaradacaq.
Nəşr həmçinin qeyd edir ki, bu müraciət OpenAI-nin rekord səviyyədə xərclədiyi dövrə təsadüf edir. Şirkət yalnız bu il təxminən 1 trilyon dollarlıq infrastruktur müqaviləsi imzalayıb. Onların arasında Oracle ilə 300 milyard dollarlıq əməkdaşlıq və Oracle və SoftBank ilə birgə həyata keçirilən 500 milyard dollarlıq Stargate layihəsi də var.
Mənbələrin məlumatına görə, OpenAI bu il on milyardlarla dollarlıq gəlir gözləyir, lakin bu rəqəm çox yüksək hesablama xərcləri ilə müqayisədə az qalır.
Frayer həmçinin OpenAI-nin IPO (birja çıxışı) planlarını təkzib edib. Onun sözlərinə görə, şirkət hələlik səhmlərini birjada yerləşdirməyi düşünmür, əsas məqsəd biznesin böyüməsidir.
Bloomberg yazır ki, OpenAI-nin tərəfdaşlıq etdiyi şirkətlərin səhmləri yüksəlir — bu təsir “qızıl toxunuş” adlanır. Oktyabrın əvvəlində OpenAI dünyanın ən bahalı özəl şirkəti olub — onun dəyəri 500 milyard dollara çatıb.
