Toru 111 min hörümçək qurub, ümumi sahəsi 106 kvadratmetrdir...
Poliqon xəbər verir ki, Yunanıstan və Albaniya sərhədində yerləşən Sulfur (Kükürd) mağarasında alimlər dünyanın ən böyük hörümçək torunu aşkar ediblər. “Daily Mail” qəzetinin məlumatına görə, bu nəhəng toru təxminən 111 min hörümçək birlikdə qurub.
Bioloq İştvan Yurak (Sapientia Universiteti, Transilvaniya, Rumıniya) bildirib ki, torun ümumi sahəsi 106 kvadratmetrdir və bu, minlərlə kiçik torun birləşməsindən yaranmış “nəhəng yamaq örtüyü”nə bənzəyir.
Tədqiqatçının sözlərinə görə, bu tapıntı Tegenaria domestica (ev hörümçəyi) və Prinerigone vagans növləri arasında kolonial davranışın ilk elmi sübutudur. Normalda bu növlər bir-birinə qarşı aqressiv olur və ümumi torlar yaratmırlar, lakin Sulfur mağarasının şəraiti onların birgə yaşayışını təmin edib.
Araşdırmalar göstərib ki, torun içərisində təxminən 69 min ev hörümçəyi və 42 mindən çox Prinerigone vagans yaşayır. Hər iki növ mikrob biotəbəqələri ilə qidalanan kiçik milçəkləri ovlayır.
Alimlərin məlumatına görə, torun sıxlığı və ölçüsü o qədər böyükdür ki, bəzi hissələri öz ağırlığından divardan qoparaq düşə bilər. Bioloqlar bunu təbiətdəki nadir bir hadisə kimi qiymətləndirirlər və mağaranın ekosistemini daha dərindən öyrənmək üçün əlavə tədqiqatlar aparıldığını bildiriblər.
Poliqon.info
