ABŞ ordusunun Sakit okeanın şərq hissəsində narkotik qaçaqmalçılığı ilə məşğul olduğu iddia edilən bir qayığa qarşı həyata keçirdiyi hücum nəticəsində iki nəfər həyatını itirib.
"Cebheinfo.az" xəbər verir ki, Pentaqonun rəhbəri Pit Heqset sosial media platforması “X”-də paylaşım edərək hücumun ABŞ Prezidenti Donald Trampın göstərişi ilə həyata keçirildiyini bildirib.
“Kəşfiyyat məlumatları göstərdi ki, sözügedən gəmi tanınmış narkotik qaçaqmalçılığı marşrutu üzrə hərəkət edir, qanunsuz narkotik ticarəti ilə əlaqəlidir və üzərində narkotik maddələr mövcuddur. Hücum Sakit okeanın şərqində beynəlxalq sularda həyata keçirilib.
Əməliyyat zamanı heç bir ABŞ hərbçisi zərər görməyib və qayığın içində olan iki kişi "narko-terrorist" öldürülüb. Amerikaya narkotik daşımaq niyyətində olan hər bir qayığı tapıb zərərsizləşdirəcəyik”, - deyə Pit Heqset əlavə edib.
