Bakı, 5 noyabr, AZƏRTAC
Noyabrın 5-də Yaponiya hökuməti ayıların hücum dalğasının öhdəsindən gəlməkdə çətinlik çəkən yerli hakimiyyət orqanlarının təcili tələbindən sonra bu heyvanları tutmaq üçün ölkənin dağlıq şimal ərazisinə qoşun yeridib.
AZƏRTAC “Reuters” agentliyinə istinadla xəbər verir ki, əməliyyat Kazuno şəhərində başlayıb. Burada sakinlərə bir neçə həftədir şəhəri əhatə edən sıx meşələrdən çəkinmək, qaranlıq düşəndən sonra evdə qalmaq və evlərinin yaxınlığında yem axtaran ayıları qorxutmaq üçün zəng taxmaq tövsiyə olunub.
“Reuters” agentliyinin xəbərində qeyd olunur ki, Yaponiya Ətraf Mühit Nazirliyinin məlumatına görə, aprel ayından bəri ölkə daxilində ayıların 100-dən çox hücumu baş verib və nəticədə rekord sayda - 12 ölüm hadisəsi qeydə alınıb.
Qoşun hissələri ayıları tutmaq üçün istifadə edilən tələlərin daşınmasına, qurulmasına və yoxlanılmasına kömək edəcək, amma heyvanlara atəş açılması bu işə daha uyğun silahlara malik olan təlim keçmiş ovçular tərəfindən həyata keçirilir.
Akita hakimiyyəti bildirir ki, bu il ayıların sayı altı dəfə artaraq 8 mini keçib və bu da prefektura qubernatorunun ötən həftə Yaponiya Özünümüdafiə Qüvvələrindən kömək istəməsinə səbəb olub.
Ayı populyasiyasının artması iqlim dəyişikliyi, yaşayış yerlərinin itirilməsi və kənd yerlərində əhalinin azalması fonunda baş verir. Yaponiyada ayılarla qarşılaşma halları da bu səbəblərdən baş verir. Hakimiyyət orqanlarının bir vaxtlar etibar etdiyi qocalmış ovçuluq qüvvəsi indi daha çox yüklənib.
Son həftələrdə ayılar supermarketdə alıcılara, UNESCO-nun Ümumdünya İrsi siyahısında yer alan obyektin yaxınlığında avtobus gözləyən turistə hücum edib və termal bulaqlar kurortunun işçisini şikəst edib. Bir neçə məktəb də yerləşdiyi ərazilərdə və ətrafında dolaşan ayıların görülməsindən sonra müvəqqəti olaraq bağlanmaq məcburiyyətində qalıb.
Ayı hücumları oktyabr və noyabr aylarında pik həddə çatır, bu zaman heyvanlar qış yuxusundan əvvəl qida axtarırlar.
Yaponiya bu ayın sonunda elan ediləcək təcili “Ayı nəzarəti” paketinin bir hissəsi olaraq lisenziyalı ovçuların sayını artırmağı planlaşdırır. Bu barədə Yaponiya Nazirlər Kabineti baş katibinin müavini Key Sato Tokioda keçirilən mətbuat konfransında bildirib. Sentyabr ayında ölkə hakimiyyəti ovçuların şəhər yerlərində ayıları vurmasını asanlaşdırmaq üçün odlu silah qaydalarını yumşaldıb.
