8 Noyabr tarixi Azərbaycan xalqının qəlbində qızıl hərflərlə yazılmış şanlı səhifədir. Müzəffər Ali Baş Komandan, Azərbaycan Respublikasının Prezidenti cənab İlham Əliyevin sarsılmaz iradəsi və möhtəşəm sərkərdəlik bacarığı sayəsində 30 illik işğala yalnız 44 gündə son qoyuldu, torpaqlarımız işğaldan azad edildi və ərazi bütövlüyümüz bərpa olundu. Bu tarixi Qələbə Azərbaycanı qalib ölkəyə, xalqımızı isə dünya səviyyəsində müzəffər, iradəli və birləşmiş bir millət kimi tanıtdı. Azərbaycan həm hərbi, həm də iqtisadi baxımdan gücünü bütün dünyaya nümayiş etdirdi.

30 illik işğal dövründə beynəlxalq səviyyədə aparılan riyakarlıq, ədalətin təmin edilməməsi, Minsk Qrupunun illərlə danışıqları nəticəsiz buraxması və BMT-nin yalnız bəyanatlarla kifayətlənməsi Azərbaycan üçün hərbi gücdən istifadəni qaçılmaz etdi. Bu müddət ərzində xalqımız hər cür təxribatlara, işğala və mənfur planlara qarşı səbir və əzmlə dayandı. Ermənistanın 1988-ci ildən başlayaraq “dənizdən-dənizə Ermənistan” ideyasını reallaşdırmaq cəhdi, kənd və şəhərlərin dağıdılması, yüz minlərlə azərbaycanlının didərgin düşməsi ilə nəticələndi. Bir milyondan çox soydaşımız 30 il ərzində qaçqın və məcburi köçkün həyatı yaşadı.

Ermənistanın müxtəlif rayonlardakı mövqelərimizə yönəltdiyi atəşlər, Tərtər, Ağdam, Goranboy və digər ərazilərdəki hücumlar xalqımızın döyüş ruhunu sındıra bilmədi. Vətənin müdafiəsi üçün Azərbaycan xalqı “İrəli!” əmrini gözlədi. Cənab Prezident İlham Əliyevin rəhbərliyi altında Azərbaycan Ordusu qətiyyətlə hərəkət etdi, əks-hücum əməliyyatına başladı və cəbhə boyu irəlilədi.

44 gün ərzində hər gün yeni torpaqlar, kəndlər, şəhərlər, strateji yüksəkliklər azad edildi. Azərbaycan Silahlı Qüvvələri “Dəmir Yumruq” əməliyyatı ilə düşmən ordusunu darmadağın edərək ərazi bütövlüyümüzü təmin etdi. Sentyabrın 27-də başlanan əks-hücum nəticəsində Cəbrayıl, Füzuli, Zəngilan, Qubadlı, Şuşa və digər ərazilər azad edildi. Noyabrın 9-da Azərbaycan Prezidenti İlham Əliyev, Rusiya Prezidenti Vladimir Putin və Ermənistanın baş naziri Nikol Paşinyan tərəfindən imzalanan üçtərəfli Bəyanat hərbi əməliyyatları dayandırdı. Ermənistan həmin sənədə əsasən Ağdam, Kəlbəcər və Laçın rayonlarını təhvil verdi.

Vətən müharibəsinin şərəfinə Bakıda yaradılan Hərbi Qənimətlər Parkı xalqımıza Ordumuzun gücünü göstərir. Parkdakı eksponatlar – düşmənin işğal etdiyi ərazilərdən götürülmüş hərbi texnika, raket qalıqları və digər materiallar – xalqımızın zəfər iradəsini simvolizə edir. 2020-ci ilin dekabrında Bakının Azadlıq Meydanında keçirilən Zəfər Paradı da müharibənin miqyasını və xalqımızın birliyini nümayiş etdirdi. Paradda cənab Prezident İlham Əliyev Müzəffər Ali Baş Komandan kimi ordumuza rəhbərlik etdi, Türkiyə Prezidenti Rəcəb Tayyib Ərdoğan isə Azərbaycanla qardaşlıq birliyini nümayiş etdirdi.

Cənab Prezident İlham Əliyevin 2020-2021-ci illərdə imzaladığı sərəncamlar nəticəsində 159 mindən çox iştirakçı müxtəlif orden və medallarla təltif olundu. “Zəfər” və “Qarabağ” ordenləri, “Vətən Müharibəsi Qəhrəmanı” və digər yeni medalların təsis olunması xalqımızın qəhrəmanlıq tarixini əbədi yazdı. Müharibədə 2907 hərbçimiz şəhid oldu, mindən çox əsgər yaralandı, 7 nəfər isə itkin düşdü. Postmüharibə dövründə dövlətimiz şəhid ailələrinə və müharibə iştirakçılarına geniş sosial dəstək göstərdi.

Qardaş Türkiyənin dəstəyi Azərbaycan xalqına əlavə güc verdi. Türkiyə Prezidenti Rəcəb Tayyib Ərdoğanın “Azərbaycan tək deyil, Türkiyə onun yanındadır” bəyanatı, daha sonra imzalanan Şuşa Bəyannaməsi ilə müttəfiqlik zirvəyə ucaldı.

İndi azad edilmiş 10 min kvadratkilometr ərazidə yeni həyat qurulur. Şəhər və kəndlərimizdə məktəblər, xəstəxanalar, məscidlər, mədəniyyət obyektləri inşa olunur, dəmir yolları, tunellər çəkilir. Azərbaycan xalqı əmindir ki, cənab Prezident İlham Əliyevin liderliyi ilə bu zəfərlər davam edəcək və yeni uğur zirvələri fəth ediləcək.

Fərid Ramazanov,
YAP Zaqatala rayon təşkilatının sədri.

• Siyasət
• Ərazi Bütövlük
• Dəmir Yumruq