Rusiya ictimai qruplarının məlumatına görə, Nijni Novqorod vilayətinin Kstovo şəhərində gecə saatlarında dron hücumu nəticəsində “Lukoyl” şirkətinə məxsus neft anbarı və yaxınlıqdakı neft-kimya zavodu ərazisində güclü yanğın baş verib.
KONKRET.az xəbər verir ki, sakinlər ardıcıl partlayış səsləri eşidib və sənaye zonasının üzərində parlaq alov işığı müşahidə ediblər.
“Astra” kanalı tərəfindən aparılan video təhlili yanğının sənaye zonasının cənub-şərq hissəsində, SIBUR-Kstovo və Lukoyl-Nijeqorodnefteorgsintez zavodlarının yerləşdiyi ərazidə baş verdiyini təsdiqləyib.
Qeyd olunur ki, Lukoyl-Nijeqorodnefteorgsintez Rusiyanın ən iri neft emalı müəssisələrindən biridir və Moskva regionunu yanacaqla təmin edir. SIBUR-Kstovo isə etilen, propilen, benzol və digər neft-kimya məhsullarının istehsalı ilə məşğuldur.
Hadisə nəticəsində xəsarət alanlar barədə hələlik məlumat verilmir. Rusiya tərəfi hücumla bağlı rəsmi açıqlama yaymayıb.
Müşviq Tofiqoğlu
KONKRET.az
