ABŞ-da keçirilən yeni sorğuya görə, iştirakçıların 64 faizi Prezident Donald Trampın səlahiyyətlərini həddən artıq istifadə etdiyini hesab edir. Cavabdehlər Trampın dövlət işçilərini işdən çıxarmaq, federal işçi qüvvəsini azaltmaq, şəhərlərdə patrul xidmətinə Milli Qvardiya qüvvələrini yerləşdirmək və universitetlərin fəaliyyət prinsiplərini dəyişmək kimi addımlarını tənqid ediblər.
Washington Post, ABC News və Ipsos şirkətlərinin birgə keçirdiyi onlayn sorğuda 2 min 725 ABŞ vətəndaşı iştirak edib. Sorğu Tramp administrasiyasının iqtisadiyyat, immiqrasiya, gömrük rüsumları, federal idarəetmə, cinayət, Yaxın Şərq və Ukrayna münaqişələri kimi səkkiz mövzu üzrə fəaliyyətini qiymətləndirib.
Nəticələrə əsasən, iştirakçıların 64 faizi Trampın prezident səlahiyyətlərindən istifadə etməkdə “çox irəli getdiyini” düşünür.
İqtisadi siyasətlə bağlı sorğuda iştirak edənlərin 62 faizi Trampın iqtisadi kursunu mənfi, 37 faizi isə müsbət qiymətləndirib.
Respondentlərin təxminən üçdə ikisi ABŞ-ın hazırda “ciddi şəkildə yanlış istiqamətdə” irəlilədiyini, üçdə biri isə işlərin doğru istiqamətdə getdiyini bildirib.
Trampın digər ölkələrə tətbiq etdiyi ticarət rüsumları ilə bağlı iştirakçıların 65 faizi bu siyasəti bəyənmədiyini, 33 faizi isə dəstəklədiyini qeyd edib.
İmmiqrasiya siyasətinə münasibətdə iştirakçıların 56 faizi mənfi, 43 faizi isə müsbət rəy bildirib.
Rusiya–Ukrayna müharibəsi ilə bağlı Trampın tutumu və münaqişəni bitirmə cəhdlərini isə iştirakçıların 60 faizi “yetərsiz”, 39 faizi isə “müsbət” qiymətləndirib.
