Belçikanın müdafiə və xarici ticarət naziri Teo Francken ətrafında yaranan qalmaqal Avropa mətbuatının və Rusiya mediasının əsas mövzusuna çevrilib.
Musavat.com xəbər verir ki, nazir De Morgen qəzetinin onun adından yaydığı “Əgər Putin Brüsseli vursa, biz Moskvani xəritədən silərik” ifadəsini “tamamilə təhrif olunmuş və ədalətsiz” adlandırıb.
Francken məsələ ilə bağlı RTBF telekanalına açıqlama verib və bildirib ki, onun sözləri “De Morgen” tərəfindən kontekstdən çıxarılıb:
“Müsahibəni mən ‘Humo’ jurnalına vermişdim. Orada jurnalist mənə sual verdi ki, Putin Brüsseli nüvə zərbəsi ilə vura bilərmi? Mən dedim: ‘Xeyr, etməyəcək.’ O soruşdu: ‘Niyə bu qədər əminsiniz?’ Mən isə cavab verdim: ‘Çünki o bilir ki, NATO buna cavab verəcək.’ Bu, 76 ildir qüvvədə olan alyans prinsipidir. Amma ‘De Morgen’ bunu dəyişdirib, başlığa tam fərqli mənada çıxarıb.”
Nazir əlavə edib ki, bu yanlış başlıq Belçikada, Avropada və Rusiyada geniş rezonans doğurub, lakin onun heç vaxt “Moskvanı xəritədən silmək” kimi ifadə işlətmədiyini vurğulayıb:
“Mən sadəcə dedim ki, Putin Brüsseli vurmayacaq, çünki o, nəticələrin çox ciddi olacağını bilir. Başlıq isə tamamilə yalandır və bu, beynəlxalq miqyasda yanlış reaksiyalara səbəb olub”.
Hadisə Avropa ictimaiyyətində mediada məsuliyyət və redaksiya etikasının pozulması barədə müzakirələrə yol açıb. Bir çox siyasətçilər və ekspertlər “De Morgen”in başlıq seçimini “təxribat xarakterli” adlandırıb və belə halların beynəlxalq gərginliyi dərinləşdirdiyini bildiriblər.
Rusiya tərəfi isə Franckenin sözlərini ilk versiyaya əsaslanaraq “aqressiv bəyanat” kimi qiymətləndirib və NATO-nun ritorikasını “təhlükəli eskalasiya dili” adlandırıb.
Bütün bu hadisələrin fonunda Belçika hökuməti daxili istintaqın başladıldığını təsdiqləyib. Nazirlikdən verilən açıqlamaya görə, məqsəd müsahibənin ilkin variantı ilə “De Morgen”də dərc olunan mətn arasında uyğunsuzluqları aydınlaşdırmaqdır.
Beləliklə, Belçika naziri ilə bağlı mediada yaranan qalmaqal, təkcə mətbuatın manipulyasiya gücünü deyil, həm də Qərbdə siyasi ritorikanın nə qədər riskli həddə çatdığını bir daha göstərdi.
Musavat.com
