Soyuq havaların başlaması ilə orqanizmin immunitetini güclü saxlamaq daha da önəm qazanır. Mütəxəssislər noyabr ayında mövsümə uyğun qidaların qəbul edilməsini tövsiyə edir.
Far.Az xəbər verir ki, qidalanma üzrə mütəxəssislərin fikrincə, bu dövrdə C vitamini ilə zəngin meyvə və tərəvəzlərə üstünlük verilməlidir. Portağal, naringi, kivi, limon kimi sitrus meyvələri soyuqdəymə və qripdən qoruyur.
Bundan başqa, balqabaq, kələm, çuğundur, kök kimi tərəvəzlər orqanizmin ehtiyac duyduğu minerallarla zəngindir. Qoz, badam, fındıq kimi quru meyvələr də immuniteti gücləndirir və orqanizmin enerji balansını qorumağa kömək edir.
Həkimlər həmçinin bal, zəncəfil, sarıkök və isti bitki çaylarının da noyabr ayında gündəlik qidalanmaya əlavə edilməsini məsləhət görürlər.
Mütəxəssislər vurğulayırlar ki, düzgün mövsümi qidalanma yalnız xəstəliklərdən qorunmağa deyil, həm də payız yorğunluğunu azaltmağa kömək edir.
