Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Aşıq Pəri Məclisi” Ozan Sənətinin Təbliği İctimai Birliyi tərəfindən həyata keçirilən "Aşıq sənətinin yeniyetmə və gənclər arasında təbliği" adlı layihə çərçivəsində növbəti yeddinci dərs 4 oktyabr tarixində Bakı şəhərində, “Aşıq Ədalət Nəsibov” adına Musiqi Tədris Mərkəzinin ofisində baş tutub.
Tədbiri açan “Aşıq Pəri Məclisi” Ozan Sənətinin Təbliği İctimai Birliyinin sədri, layihənin rəhbəri, şairə Pərvanə Mustafayeva iştirakçıları salamlayaraq bildirdi ki, bu gün hər biriniz üçün yeni bir yolun başlanğıcıdır. İnanıram ki, gələcəkdə sizlərin arasından tanınmış ustad aşıqlar yetişəcək. Bunun üçün daim öz üzərinizdə işləməli, verilən tapşırıqları məsuliyyətlə yerinə yetirməlisiniz.
Daha sonra söz Aşıq Ədalət Nəsibov adına Musiqi Tədris Mərkəzinin əməkdaşı, aşıq Cavanşir Quliyevə verilib. Aşıq Cavanşir əvvəlki dərslərdə öyrənilən mövzulara qısa xatırlatma etdikdən sonra yeni dərs mövzusunu izah edib, iştirakçılara öz bacarıq və istedadlarını nümayiş etdirmək imkanı yaradıb.
Dərs yeniyetmə və gənclərin fəal iştirakı ilə keçib, tədris prosesi interaktiv və yaradıcı mühitdə davam etdirilib.
Tədbirin sonunda Pərvanə Mustafayeva Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinə bir daha təşəkkürünü bildirərək qeyd edib ki, bu layihə qədim və zəngin milli irsimiz olan aşıq sənətinin yaşadılması istiqamətində dövlətlə vətəndaş cəmiyyətinin əməkdaşlığının parlaq nümunəsidir.
Qeyd edək ki, 3 ay müddətinə nəzərdə tutulan layihə çərçivəsində 8 nəfər yeniyetmə və gənc üçün ümumilikdə 10 praktiki aşıq dərsi keçiriləcək.
.1761205722.jpeg)
