Kubanın baş prokuroru ölkənin sabiq iqtisadiyyat nazirini casusluq və bir sıra maliyyə cinayətləri ilə ittiham edib. Ajans.az “Al Jazeera” kanalına istinadən xəbər verir ki, Kubanın baş prokurorluğunun ofisi 2024-cü ilin fevralına qədər ölkənin iqtisadiyyat və planlaşdırma naziri vəzifəsində çalışmış Alehandro Gilin və bir sıra digər adları açıqlanmayan təqsirləndirilən şəxslərin təxminən iki illik cinayət istintaqını başa çatdırdığını açıqlayıb. Baş prokurorluq bildirib ki, Gil və digərləri casusluq, mənimsəmə, rüşvətxorluq və digər ittihamlar üzrə məsuliyyət daşıyacaqlar. Digər ittihamlara dövlət sənədlərinin saxtalaşdırılması, vergidən yayınma, çirkli pulların yuyulması, məxfi sənədlərlə bağlı qaydaların pozulması və rəsmi saxlanmada olan sənədlərin və ya digər əşyaların oğurlanması və ya zədələnməsi daxildir. Məhkəmə tarixi hələ açıqlanmayıb. Qeyd edilib ki, Kubanın cinayət məcəlləsinə əsasən, sadalanan ittihamlar 10 illik həbsdən ölüm hökmünə qədər cəzalandırılır. Qeyd edək ki, sabiq nazir ona qarşı irəli sürülən heç bir ittihama açıq şəkildə cavab verməyib və ona qarşı istintaq başlayandan bəri ictimaiyyətdə görünməyib.
