“Real Madrid”in baş məşqçisi Xabi Alonso Vinísiusun “El Klasiko” zamanı Rodriqo ilə əvəz edildikdən sonra göstərdiyi davranışa görə üzr istəməsini dəyərləndirib.
Offsideplus.az xəbər verir ki, Alonso mətbuat konfransında bildirib ki, braziliyalı futbolçuya qarşı heç bir cəza olmayacaq:
“Çərşənbə günü, iki günlük istirahətdən sonra bütün heyətlə görüşdük və Vinísius çox yaxşı, əla idi. O, ürəkdən və səmimi danışdı, mən çox məmnun qaldım. Mənim üçün bu məsələ həmin andan bağlanıb.”
Baş məşqçi əlavə edib:
“Bu, çox dəyərli və pozitiv açıqlama idi. Vini dürüstlüyünü göstərdi. O, bu klubun mənasını və nə vermək istədiyini ürəkdən ifadə etdi.”
Alonso vurğulayıb ki, üzr istədikdən sonra braziliyalının performansına təsir göstərəcək heç bir səbəb yoxdur və indi diqqət növbəti oyuna yönəlib:
“Məsələ bağlanıb və sabah ən önəmli oyun var. Heç bir cəza yoxdur. Sizin diqqətinizin bu məsələdə olduğunu anlayıram və hörmət edirəm, amma çərşənbədən bəri danışdıq və pozitiv şəkildə həll etdikdən sonra fokus meydandadır.”
