Gəncə Apellyasiya Məhkəməsində hədə-qorxu ilə tələb etmədə təqsirləndirilən Samir Bəşirovun (adı, soyadı şərtidir) barəsindəki hökmdən verilən apellyasiya şikayəti üzrə məhkəmə prosesi başa çatıb.
Pravda.az-ın əldə etdiyi məlumata görə, hakim Müşfiq Məmmədovun sədrliyi ilə keçirilən prosesdə qərar elan edilib.
Qərara əsasən, apellyasiya şikayəti qismən təmin edilib, Şəmkir Rayon Məhkəməsinin 20 may 2025-ci il tarixli hökmü dəyişdirilib, təqsirləndirilən şəxsin 3 il müddətə azadlıqdan məhrumetmə cəzası şərti hesab edilib. Samir Bəşirovun barəsində seçilmiş həbs qətimkan tədbiri başqa yerə getməmək haqqında iltizam qətimkan tədbiri ilə əvəz olunub və o, məhkəmə iclas zalında dərhal həbsdən azad edilib.
İttihama görə, Samir Bəşirov 30 aprel 2024-cü il tarixdə, tamah məqsədilə, özgənin əmlakını qanunsuz və əvəzsiz yolla əldə etmək niyyəti ilə əvvəlcədən planlaşdırılmış hərəkətlər edib.
Belə ki, o, əvvəllər qeyri-rəsmi münasibətdə olduğu, Bakı şəhəri, Nəsimi rayonunda yaşayan zərərçəkmiş S.S. (adı, soyadı şərtidir) ilə əlaqə saxlayaraq, onun rüsvayedici çılpaq video görüntüləri və fotoşəkilləri yaymaq hədəsi ilə pul tələb edib.
Təqsirləndirilən şəxs “WhatsApp” sosial şəbəkəsi vasitəsilə qadına mesaj göndərib və onun barəsində rüsvayedici məlumatlar yayacağı ilə hədələyərək S.S.-dən 200 manat məbləğində pul tələb edib. Samir zərərçəkmiş şəxs tələbini yerinə yetirmədiyi təqdirdə, aralarında münasibətlərin davam etdiyi dövrdə onun tərəfindən göndərilmiş video və fotomaterialları sosial şəbəkələrdə, qohumları arasında və qadının iş yeri olan şirkətin rəhbərinə göndərəcəyini bildirib.
Təqsirləndirilən şəxs bu hədələr vasitəsilə zərərçəkmiş şəxsə psixoloji təzyiq göstərib, onun şəxsi və ailə nüfuzuna zərər vurmaqla tamah məqsədli hədə-qorxu yolu ilə pul tələb edib. Nəticədə Samir qadından 50 manat məbləğində pulu ələ keçirib.
Hadisədən sonra Samir Bəşirov saxlanılaraq cinayət məsuliyyətinə cəlb edilib.
Birinci instansiya məhkəməsinin yuxarıda qeyd edilən hökmündən təqsirləndirilən şəxsin müdafiəçisi tərəfindən apellyasiya şikayəti verilib, müdafiə etdiyi şəxsin bəraətinə dair hökm çıxarılması xahiş olunub.
Kamal Məmmədov
