Çinin avtomobil istehsalçısı BYD-nin xalis mənfəəti üçüncü rübdə 7,82 milyard yuan (təxminən 1,1 milyard dollar) təşkil edib ki, bu da ötən ilin eyni dövrü ilə müqayisədə 32,6% azdır. Bu, şirkətin son dörd ildən artıq müddətdə ən böyük mənfəət azalmasıdır.
BYD-nin mənfəəti artıq ardıcıl ikinci rüb azalır. Şirkətin iyul–sentyabr dövrü üzrə gəliri 195 milyard yuan (təxminən 27,4 milyard dollar) olub ki, bu da “Bloomberg” analitiklərinin 216 milyard yuanlıq konsensus proqnozundan aşağıdır. Bundan əlavə, ötən illə müqayisədə satışlar 3,1% azalıb.
Analitiklər BYD-nin göstəricilərinin azalmasını bir tərəfdən Çin bazarındakı kəskin rəqabətlə əlaqələndirirlər: sentyabr ayında BYD satış həcminə görə SAIC şirkətinə birinciliyi verib, bazar payı isə 18%-dən 14%-ə düşüb. Digər tərəfdən, BYD hazırda 2026-cı ildə modellər xəttini genişmiqyaslı yeniləmədən əvvəl avtomobil ehtiyatlarını satmağa çalışır. Aqressiv endirimlər isə gözlənildiyi kimi şirkətin gəlirlərinə mənfi təsir göstərir.
