ain.az, Avtosfer saytına istinadən bildirir.
Paytaxt yollarında bəzi sürücülər tərəfindən yol verilən səhvlərdən sonra təhlükəli məqamlar yaranır. Hamımız belə hallarla tez-tez rastlaşırıq.
Avtosfer.az xəbər verir ki, bəzi hallarda sürücülər və ya ustalar yolun kənarında, xüsusilə də təhlükəli tərəfdə, yəni yol istiqamətində avtomobilin təkərini təmir edir və ya təkərləri qaraldırlar. Bu isə ciddi təhlükə yaradır.
Qəza əleyhinə kursların məşqçisi Aqil Rəhimov bildirir ki, belə hallarda insanlar əyilərək iş gördükləri üçün müvazinətlərini itirə bilərlər. Əgər siz onların yanından keçərkən bu baş versə, həmin şəxsin bədəni və ya başı avtomobilinizin altında qala bilər.
Məşqçi sürücülərə məsləhət görür ki, belə situasiyalarda ara məsafəsini düzgün saxlasınlar:
“Yoldan keçərkən təkər təmir edən usta və ya təkər qaraldan sürücüyə yaxın məsafədə manevr etməyin. Elə məsafə saxlayın ki, əgər o şəxs yıxılarsa, sizin avtomobilin təkərləri onun üzərinə gəlməsin.”
Aqil Rəhimov əlavə edib ki, bəzən bəzi sürücülər bu barədə deyilən məsləhətləri ciddiyə almır və “özləri günahkardır, mən nə edə bilərəm?” – kimi fikirlər səsləndirirlər.
“Ancaq unutmaq lazım deyil ki, belə bir hadisə baş verərsə, sürücünün özü də məsuliyyət daşıyır. Çünki Cinayət Məcəlləsində ehtiyatsızlıqdan insanın ölümünə səbəb olma maddəsi hələ də qüvvədədir. Buna görə də ehtiyatlı olun. Belə ehtiyatsız insanları qorumaqla, əslində özünüzü qorumuş olursunuz,” – deyə məşqçi vurğulayıb.
Eltac Zülfüqaroğlu
Hadisənin gedişatını izləmək üçün ain.az saytında ən son yeniliklərə baxın.
