Bizimyol saytından verilən məlumata əsasən, ain.az məlumatı açıqlayır.
Astaranın Deqədi kəndində baş verən son faciə cəmiyyətdə bir daha erkən nikahlar və gənc qızların məruz qaldığı sosial təzyiqlər mövzusunu gündəmə gətirib. Məlumata görə, 2008-ci il təvəllüdlü Əfsanə İmanova toyundan bir gün sonra vəfat edib. O, toydan sonra özünü pis hiss edib və xəstəxanaya çatdırılsa da, həkimlərin səylərinə baxmayaraq həyatını itirib. İlkin məlumata əsasən, gənc qadının hamilə olduğu bildirilir.
Bu hadisə təkcə bir ailənin yox, bütöv bir cəmiyyətin faciəsidir. Çünki bu kimi halların kökündə bir çox sosial problemlər dayanır. Erkən nikahlar, maarifləndirmənin zəifliyi, səhiyyə xidmətlərinə çıxışın məhdudluğu və qızların reproduktiv sağlamlığına biganə münasibət.
Azərbaycanda qanunvericilik nikah yaşını qadınlar üçün 18 yaş müəyyən etsə də, bəzi bölgələrdə hələ də qeyri-rəsmi və ya “dini kəbin”lə erkən nikahlar müşahidə olunur. Bu nikahlar qız uşaqlarının təhsil, sağlamlıq və sosial hüquqlarını əlindən alır. Həmçinin, fizioloji cəhətdən hamiləliyə hazır olmayan gənc qızlar üçün bu, çox zaman sağlamlıq riskləri və ölümcül nəticələrlə yekunlaşır.
Mütəxəssislər hesab edirlər ki, belə hadisələrin qarşısını almaq üçün təkcə qanunla deyil, ictimai düşüncə ilə də mübarizə aparmaq lazımdır. Ailələr qız uşaqlarının gələcəyinə “evlənmək” yox, “təhsil almaq” prizmasından yanaşmalıdırlar.
Bundan başqa, yerli icmalar, məktəblər və dini liderlər arasında geniş maarifləndirmə işi aparılmalıdır. Qız uşaqlarının hüquqları və sağlamlıq təhlükələri barədə açıq və sistemli müzakirələrə ehtiyac var.
Astara hadisəsi tək bir ailənin dərdi deyil. Bu, erkən nikah və sosial məsuliyyətsizlik probleminin canlı nümunəsidir. Cəmiyyət olaraq hər birimiz bu kimi faciələrin təkrarlanmaması üçün məsuliyyət daşıyırıq. Hər bir qız uşağı sağlam böyümək, təhsil almaq və öz gələcəyinə özü qərar vermək haqqına malikdir.
Leyla Mirzə, Bizimyol.info
Daha ətraflı məlumat və yeniliklər üçün ain.az saytını izləyin.
