“Samsung Electronics” şirkəti iki dəfə qatlanan displeyli telefon təqdim edib.
Yeniavaz.com xəbər verir ki, bu barədə “The Verge” məlumat yayıb.
Telefon Cənubi Koreyanın Kyoncu şəhərində Asiya-Sakit Okean İqtisadi Əməkdaşlıq Təşkilatının (APEC) sammiti zamanı keçirilən sərgidə təqdim edilib. Telefon şüşənin arxasında, qatlanmış və açılmış şəkildə nümayiş etdirilib. Heç kim cihaza toxuna bilməyib.
“Bloomberg”in daha əvvəl xəbər verdiyi kimi, bu, “Samsung”un həm adi smartfon, həm də planşet kimi işləməyə imkan verən iki menteşəli ilk telefonudur. Cihazın texniki xüsusiyyətləri məlum deyil.
Nəşr qeyd edir ki, bu modelin adı yoxdur. Bununla belə, Cənubi Koreyanın “Dailian” nəşri yazır ki, qurğu “Galaxy Z Trifold” adlanacaq.
“Samsung”dan bildirilib ki, təqdimat davam edən tədqiqat və təkmilləşdirmə səylərini əks etdirir və şirkət 2025-ci ilin sonuna qədər növbəti nəsil cihaz təqdim etməyi planlaşdırır.
Xatırladaq ki, “Samsung” 2019-cu ildə qatlanan displeyli ilk telefonunu təqdim etdi. 2025-ci ilin iyul ayında Cənubi Koreya istehsalçısı yeddinci nəsil kitab formalı qatlana bilən smartfon “Galaxy Z Fold 7”ni buraxıb.
Dünyanın iki dəfə qatlanan ilk telefonu 2024-cü ildə Çinin “Huawei” şirkəti tərəfindən təqdim edilib. 2025-ci ilin sentyabrında istehsalçı ikinci nəsil cihazın buraxıldığını elan edib.
Qeyd edək ki, KİV-in yaydığı məlumata görə, “Apple” həmçinin 2026-cı ildə ilk qatlanan “iPhone”u buraxmağı planlaşdırır.
— BIswatma (@thebiswatma) October 28, 2025
