London, 28 oktyabr, AZƏRTAC
Böyük Britaniyanın Baş naziri Kir Starmer və müdafiə naziri Con Hili Ankaraya səfər edərək Türkiyə Prezidenti Rəcəb Tayyib Ərdoğanla “Eurofighter Typhoon” qırıcı təyyarələrinin alınması ilə bağlı danışıqlar aparıblar.
AZƏRTAC Dauninq Stritə istinadla xəbər verir ki, tərəflər arasında imzalanan 8 milyard funt sterlinq dəyərində müqavilə Türkiyəyə 20 ədəd “Eurofighter Typhoon” döyüş təyyarəsinin satışını nəzərdə tutur. Bu, 2017-ci ildən bəri Böyük Britaniyada istehsal olunan “Typhoon” təyyarələri üzrə ilk yeni sifarişdir və son onilliklərin ən böyük döyüş təyyarəsi ixrac sövdələşməsi hesab olunur.
Razılaşmaya əsasən, ilk təyyarələrin 2030-cu ildə təhvil verilməsi planlaşdırılır. Müqavilə, həmçinin Böyük Britaniyada 20 minədək iş yerinin qorunmasına və NATO-nun təhlükəsizliyinin gücləndirilməsinə töhfə verəcək.
Aytən Abbaslı
AZƏRTAC-ın xüsusi müxbiri
London
