“Yalnızlıq mənə dərindən düşünməyi öyrətdi. Amma bir şeyi öyrəndim - yaxşı yatmaq çox önəmlidir”
Avtomobilinin açarını içəridə qoyub piyada uzaqlaşdı. Nə ailəsinə vida etdi, nə də bir plan qurdu. 20 yaşlarında ikən meşəyə çəkildi və 27 il boyunca yalnız göy üzünə baxaraq yaşadı. Heç kimlə görüşmədi, heç kəsin gözünə görünmədi. Sükutu ilə tanınan “Şimal Göleti Tənha Adamı” nəhayət bir kamera vasitəsilə yaxalandı. Onun suallara verdiyi bir cümləlik cavab isə hər kəsi heyrətə saldı.
Sherg.az xəbər verir ki, Christopher Thomas Knight, 1965-ci ildə ABŞ-ın Meyn ştatında doğulub. Dörd qardaş və bir bacı ilə böyüsə də, çox utancaq və qapalı uşaq idi. Təbiətdə tək vaxt keçirməyi sevirdi - balıq tutur, meşələri gəzirdi. Sakit təbiəti ilə tanınırdı. Mexanika və elektronika sahəsinə erkən yaşlardan maraq göstərmişdi. Məktəbi bitirdikdən sonra qısa müddət elektronik ixtisas proqramına qatıldı və 1986-cı ildə ev təhlükəsizlik sistemləri quraşdırıcısı kimi işləməyə başladı.
Bu iş ona “iz buraxmadan yaşamağı” da öyrətdi. Müasir həyatın qaydalarından bezdiyini hiss etdikcə, bir gün qəfil işdən çıxıb hər şeyi arxada qoydu. Alətlərini qaytarmaq və ailəsinə xəbər vermək əvəzinə, son maaşını götürüb şəhəri tərk etdi.
Heç kimə xəbər vermədən yoxa çıxdı
1986-cı ildə cəmiyyəti tərk edən Christopher, həyatını Meyn meşələrində - qəbzlərdən, iş stressindən və insanlardan uzaqda keçirməyə qərar verdi. O zaman 20 yaşı var idi və demək olar ki, 50 yaşına qədər meşədən çıxmadı. Bu nə dini, nə də fəlsəfi bir səyahət idi. Sadəcə sakitlik axtarırdı.
Əvvəlcə maşınını ölkənin şərq sahillərinə doğru sürdü, bir müddət ucuz motellərdə qaldı, sonra geri dönüb şimala yönəldi. Sonunda yenidən Meyn əyalətinə qayıtdı. Ailəsinin evinin önündən keçsə də, dayanıb onlarla vidalaşmadı. Benzini bitənə qədər sürdü, sonra açarları maşında qoyub meşənin dərinliklərinə getdi. Yanında yalnız bir neçə düşərgə avadanlığı, geyim və az miqdarda yemək vardı.
Meşədə gizli düşərgə qurdu
O, Şimal Göleti yaxınlığında, istirahət evlərindən təxminən bir mil uzaqda gizli bir düşərgə qurdu. Sıx meşə örtüyü və qayalıqlar sayəsində sığınacağı demək olar ki, görünməz idi. Branda və ağac budaqlarından ibarət sığınacaq yağış səsini azaldır və istiliyi qoruyurdu.
Ərazi xüsusi mülk olsa da, ora getmək çox çətin idi. Bu səbəbdən illərlə heç kim onu tapmadı. Onun bu qədər uzun müddət tənhalıqda yaşaması əsl möcüzə sayılır.
Necə sağ qaldı?
“National Geographic” jurnalına danışan yazıçı Michael Finkel deyib:
“Christopher, elə sıx və qayalı bir meşədə yaşayırdı ki, ora gəldiyimdə əllərim kəsildi, ayaqqabılarım cırıldı. Amma o, gecələr sükut içində addımlaya bilirdi.”
O, yaşayışını təmin etmək üçün bəzən məcburən yaxınlıqdakı düşərgələrdən və yay evlərindən ərzaq, paltar və batareya oğurlayırdı. Qiymətli əşyalara toxunmurdu - polis diqqətini cəlb etməmək üçün yalnız zəruri şeylər götürürdü.
Soyuq qışlarda od yandırmırdı ki, tüstü onu ələ verməsin. Gecələr üst-üstə bir neçə yuxu torbası geyinirdi. Günlərini oxumaq, təmizlik və sadə yeməklərlə keçirirdi.
Nəhayət, yaxalandı
Uzun illər ərzində bölgədəki yay evləri dəfələrlə soyulmuşdu. Əmlak sahibləri hadisə yerlərinin “təmiz və səliqəli” olmasına təəccüblənirdilər. 2013-cü ildə ov müfəttişi Terri Hyuz gizli kamera vasitəsilə onu izləyərək yaxaladı.
Hyuz həmin anı belə xatırlayır:
“O, sadəcə oturub göyə baxırdı. Qartallar haqqında danışdı. Hər gün neçə qartalın uçduğunu saydığını söylədi. Dürüstcə desəm, çox təsirlənmişdim.”
Min dəfə oğurluq etdiyini boynuna aldı
Tutulduqdan sonra Christopher, ən azı 1000 dəfə oğurluq etdiyini etiraf etdi:
“Heç vaxt bundan zövq almırdım. Adrenalin qalxırdı, ürəyim döyünürdü, qorxurdum. Sadəcə yaşamaq üçün edirdim.”
O, etdiyi cinayətlərə görə 7 ay həbs cəzası aldı. Məhkəmədə dediyi sözlər insanları düşündürdü:
“Yalnızlıq insanın dəyərini artırır. Amma özümə baxanda kimliyimi itirdiyimi gördüm. Mənim üçün artıq tamaşaçı yox idi. Özümü izah etməyə ehtiyac qalmamışdı.”
Həbsdən sonra meşəyə qayıtmadı
Cəzasını çəkdikdən sonra qardaşının köməyi ilə kiçik bir avtomobil təmiri sexində işə düzəldi. Həyatını yenidən qurmağa çalışdı.
Onunla az sayda jurnalist görüşə bilib. Christopher, keçmişinə baxaraq sadəcə belə deyib:
“Yalnızlıq mənə dərindən düşünməyi öyrətdi. Amma bir şeyi öyrəndim - yaxşı yatmaq çox önəmlidir.”
