Budapeşt sülh sammitinin pozulması Qərbdə yeni strateji narahatlıqlar yaradıb...
Poliqon xəbər verir ki, The Wall Street Journal qəzetinin məlumatına görə, Rusiyanın atəşkəsdən imtina etməsi və Budapeştdə planlaşdırılan sülh sammitinin baş tutmaması Ukraynada müharibənin hələ uzun illər davam edəcəyi ilə bağlı qaranlıq perspektiv yaradıb, baxmayaraq ki, münaqişənin xarakteri dəyişməkdədir.
Keçmiş yüksək vəzifəli Ukrayna rəsmisi bildirib ki, hər iki tərəf hələ uzun müddət döyüş qabiliyyətinə malikdir.
“Bu müharibə ya Rusiyanın imperiya layihəsinin dağılması, ya da Ukraynanın müstəqilliyinin tam itirilməsi ilə bitəcək”, deyə o, qeyd edib.
Ukraynanın dron gücü tarazlığı dəyişir
Son aylarda Ukraynanın uzaqmənzilli pilotsuz uçuş aparatları sahəsindəki sürətli inkişafı cəbhədə qüvvələr nisbətini ciddi şəkildə dəyişdirib. Yalnız son həftələrdə 1300 kilometr radiusda yerləşən onlarla Rusiya neft emalı zavodu sıradan çıxarılıb, eləcə də uzaqdakı hərbi müəssisələr zərər görüb.
“Çarların və ya Stalinin dövründə Rusiyanın gücü onun genişliyində idi. O qədər böyük idi ki, həmişə işğalçı orduları udurdu. İndi isə Ukraynanın Rusiyanın dərinliklərinə daxil olub infrastruktur obyektlərinə zərbə endirmək imkanı bu genişliyi zəifliyə çevirib”, deyə ABŞ ordusunun Avropadakı sabiq komandanı, general-leytenant Ben Hodces qeyd edib.
Rusiya neft infrastrukturu təhlükədə
Budapeştdə yerləşən Erste Group şirkətinin enerji analitiki Tamaş Pletserin sözlərinə görə, Rusiyanın qərb hissəsində təxminən 25–30 “xüsusilə həssas” nöqtə var.
“Əgər Ukrayna bu məntəqələri bombalaya bilsə, Rusiyanın iqtisadi dayaqları çökmüş sayılacaq”, deyə analitik vurğulayıb.
Pletser əlavə edib ki, Moskva nefti emal, saxlama və ixrac imkanlarını itirərsə, hasilatı dayandırmağa məcbur olacaq. Bu isə bəzi yataqların geri dönüşsüz şəkildə bağlanması deməkdir.
Poliqon.info
