Almaniya kansleri Vaşinqtonla istisna razılaşması əldə olunacağına ümid edir...
Poliqon xəbər verir ki, Almaniya kansleri Fridrix Merts ABŞ-ın “Rosneft” və “LUKOYL” şirkətlərinə qarşı elan etdiyi yeni sanksiyaların Almaniyada fəaliyyət göstərən “Rosneft Deutschland” bölməsinə şamil edilməyə biləcəyini bildirib. Onun sözlərinə görə, Berlin Vaşinqtonla bu məsələni müzakirə edəcək və istisna qərarı əldə etməyə çalışacaq.
“Rosneft”in Almaniyadakı fəaliyyəti hazırda Almaniya hökumətinin nəzarəti altındadır, lakin şirkətin mülkiyyəti hələ də Rusiyaya məxsusdur. Bu bölmə ölkənin əsas enerji təchizatçılarından biri kimi həm avtomobil yanacaqdoldurma məntəqələrinə, həm də bir sıra hava limanlarına neft məhsulları çatdırır. “Biz bu məsələni amerikalılarla müzakirə edəcəyik. Hesab edirəm ki, ‘Rosneft’ üçün istisna tətbiq olunacaq”, — deyə Merts Reuters agentliyinə açıqlamasında qeyd edib.
Xatırladaq ki, ABŞ Maliyyə Nazirliyi oktyabrın 22-də Rusiyanın enerji sektoruna qarşı yeni sanksiyalar elan edib. Qərar “Rosneft” və “LUKOYL” şirkətlərinin ABŞ-dakı bütün aktivlərinin dondurulmasını və Amerika şirkətlərinə onlarla hər hansı ticarət əlaqəsi qurmağı qadağan edir. Reuters yazır ki, bu qərardan sonra Çinin dövlət neft şirkətləri Rusiya neftinin alışını dayandırıb, Hindistanın dövlət neft emalı zavodları isə mövcud müqavilələri yenidən nəzərdən keçirməyə başlayıblar.
Poliqon.info
