ABŞ prezidenti Donald Tramp Rusiya ərazisinin dərinliklərində hədəfləri vurmaq üçün Ukraynaya Amerikanın uzaqmənzilli “Tomahavk” raketlərindən istifadə etməyə icazə verməlidir.
AFN.az xəbər verir ki, bunu “Politico”-ya müsahibəsində Finlandiyanın baş naziri Petteri Orpo bildirib. O, Rusiyanın Avropa təhlükəsizliyinə daimi təhlükə yaratdığı barədə xəbərdarlıq edib və Trampı Ukraynanı özünümüdafiə üçün lazım olan silahlarla təmin etməyə, Vladimir Putini danışıqlar masasına oturmağa inandırmağa çağırıb.
“Putin yalnız gücə inanır. Əgər müharibəni dayandırmaq istəyiriksə, Rusiyadan güclü olmasa da, eyni səviyyədə olmalıyıq”, - deyə Orpo qeyd edib.
O, Trampın Ukraynanı lazımi raketlərlə təmin edəcəyinə ümid etdiyini bildirib.
“Mən çox ümid edirəm ki, onlar Rusiyaya qarşı əks-hücum və özünümüdafiə üçün lazımi imkanları əldə edəcəklər. Biz bilirik ki, bu, Zelenski ilə ABŞ arasında olan məsələdir və mən çox ümid edirəm ki, onlar öz həllini tapacaqlar”. O, həmçinin Ukrayna üçün təzminat krediti əldə etmək məqsədilə dondurulmuş Rusiyanın maliyyə aktivlərinə həbs qoyulması və vəsaitlərin hansı şərtlərlə istifadə olunacağına münasibət bildirib.
Orponun fikrincə, Avropa bu məsələdə söz sahibi olmalıdır: “Mən tam azadlığın ən yaxşı variant olduğunu düşünmürəm. Biz kreditlər veririk və buna görə də onlarla sıx əməkdaşlıq etməliyik, əmin olmalıyıq ki, onlar bu böyük məbləğdə puldan məsuliyyətlə istifadə edəcəklər”.
