Macarıstanın xarici işlər naziri görüşün yalnız vaxtının müəyyənləşmədiyini bildirib...
Poliqon xəbər verir ki, Macarıstanın xarici işlər naziri Peter Siyarto ABŞ Dövlət Katibi Marko Rubio ilə Vaşinqtonda keçirdiyi danışıqlardan sonra Vladimir Putin və Donald Tramp arasında görüşün mütləq baş tutacağına əmin olduğunu deyib. Onun sözlərinə görə, tərəflər arasında dialoqun artıq siyasi səviyyədə razılaşdırılması prosesi başlayıb və indi söhbət yalnız görüşün dəqiq tarixindən gedir.
Siyarto bəyan edib ki, Rusiya və ABŞ arasında mümkün görüş beynəlxalq sabitlik və Avropadakı təhlükəsizlik balansı baxımından mühüm əhəmiyyət daşıyır. “Heç bir şübhə yoxdur ki, bu görüş keçiriləcək. Sual yalnız ondadır ki, nə vaxt baş tutacaq”, deyə macar nazir vurğulayıb.
O, həmçinin qeyd edib ki, Budapeşt Vaşinqton və Moskva arasında dialoqun bərpasını alqışlayır və regionda sülhün təmin olunmasının ancaq birbaşa danışıqlar yolu ilə mümkün olduğunu düşünür. Siyartonun sözlərinə görə, Macarıstan bu istiqamətdə diplomatik körpü rolunu oynamağa hazırdır.
Analitiklər bildirirlər ki, Siyartonun bu açıqlaması yaxın aylarda gözlənilən Putin–Tramp görüşü barədə artan ehtimalları daha da gücləndirir. Qeyd edək ki, daha əvvəl Macarıstanın baş naziri Viktor Orban da iki lider arasında hazırlıqların davam etdiyini açıqlamışdı.
Poliqon.info
