ABŞ texnologiya şirkəti OpenAI “ChatGPT Atlas” adını verdiyi süni intellektlə gücləndirilmiş veb-brauzerini təqdim edib.
OpenAI tərəfindən yayımlanan açıqlamada bildirilib ki, Atlas — mərkəzində ChatGPT olan və süni intellektlə təchiz edilmiş brauzer kimi hazırlanıb.
Açıqlamada qeyd olunub ki, Atlas brauzerinə ChatGPT yaddaşı daxildir və bu sayədə əvvəlki söhbətlərdə yer alan məlumatlar və detallardan yeni tapşırıqlarda istifadə etmək mümkündür.
Bundan əlavə, brauzerin yaddaşı sayəsində ChatGPT ziyarət edilən saytlardakı konteksti xatırlaya və ehtiyac yarandıqda onu geri gətirə bilir.
Yaddaş funksiyasının tamamilə istəyə bağlı olduğu vurğulanıb. İstifadəçilər bu yaddaşı istədikləri vaxt görüntüləyə, arxivləşdirə və ya silə bilərlər.
Açıqlamada həmçinin qeyd edilib ki, baxış tarixçəsinin silinməsi ilə əlaqəli yaddaş qeydləri də avtomatik olaraq silinir.
“ChatGPT Atlas”ın bu gündən etibarən macOS əməliyyat sistemi istifadəçiləri üçün Free, Plus, Pro və Go planlarında istifadəyə açıldığı, Windows, iOS və Android əməliyyat sistemləri üçün isə yaxın zamanda əlçatan olacağı bildirilib.
Açıqlamada Atlas-da “agent modu”nun da mövcud olduğu qeyd edilib. Bu rejim istifadəçi adından araşdırma aparmaq, analiz etmək, tədbir planlaşdırmaq və görüş təyin etmək kimi tapşırıqları yerinə yetirə bilir. “Agent modu” hazırda ChatGPT Plus, Pro və Business istifadəçiləri üçün ilkin baxış mərhələsində təqdim olunub.
