ABŞ Müdafiə Nazirliyi yeni daxili direktivlə əməkdaşlarının Kapitoli təmaslarını nəzarətə alır...
Poliqon xəbər verir ki, ABŞ Müdafiə Nazirliyi (Pentaqon) Konqreslə qarşılıqlı əlaqə siyasətini ciddi şəkildə dəyişib. NBC News telekanalının əldə etdiyi beş səhifəlik yeni xidməti qeyddə göstərilir ki, nazirlik əməkdaşlarının Konqres üzvləri və onların ofisləri, eləcə də digər seçkili vəzifəlilər ilə təmasdan əvvəl mütləq razılıq almaları tələb olunur.
15 oktyabr tarixli sənəd müdafiə naziri Pit Hegset və nazirin müavini Stiv Faynberq tərəfindən imzalanıb. Sənədə əsasən, Pentaqonun bütün rəsmiləri, o cümlədən Birləşmiş Qərargah Rəisləri Komitəsinin sədri belə, Konqreslə istənilən əlaqə üçün Nazirliyin qanunvericilik məsələləri üzrə idarəsindən icazə almalıdır. Yeni qaydalar “təxirəsalınmadan qüvvəyə minir” və bütün “qanunvericilik fəaliyyəti”nin həmin idarə vasitəsilə əlaqələndirilməsini tələb edir.
Bu, əvvəlki təcrübədən tam fərqlidir. Əvvəllər Müdafiə Nazirliyinin bölmələri Konqreslə əlaqələri müstəqil şəkildə həyata keçirə bilirdilər. Lakin Hegsetin rəhbərliyi dövründə Pentaqon məlumatların nəzarətdə saxlanılmasına xüsusi önəm verib. Ötən həftə onlarla jurnalist binanı tərk etməyə məcbur olub, çünki əsas xəbər agentlikləri nazirin tətbiq etdiyi sərt media məhdudiyyətlərini imzalamaqdan imtina ediblər. Yeni qaydalar, Hegsetin dediyinə görə, “icazəsiz məlumat yayımına qarşı intizam tədbirlərini” nəzərdə tutur — hətta məlumatlar məxfi olmasa belə.
Yeni direktivin məqsədi Pentaqondan Konqresə informasiya axınını daha da məhdudlaşdırmaq və “qanunvericilik hədəflərinə çatmaq” üçün koordinasiyanı gücləndirməkdir. Qeyddə vurğulanır: “Müdafiə Nazirliyinin əməkdaşları tərəfindən Konqreslə edilən icazəsiz əlaqələr, niyyətlərindən asılı olmayaraq, departamentin ümumi prioritetlərini və qanunvericilik məqsədlərini təhlükə altına qoya bilər.”
Senatın Silahlı Qüvvələr Komitəsindəki yüksək ranqlı demokrat, Rod-Aylend ştatından Cek Rid isə bu addımı sərt tənqid edib. O, Pentaqon rəhbərliyini “həqiqətdən qorxmaqda” ittiham edərək, sözügedən sənədi “Müdafiə Nazirliyində yaranan paranoyanın növbəti əlaməti” adlandırıb.
Poliqon.info
