Ron Bussonun fikrincə, Moskvanın gəlirləri azalsa da, ticarət daha gizli və izlənməsi çətin olacaq...
Poliqon xəbər verir ki, Reuters Agentliyinin icmalçısı Ron Busso ABŞ prezidenti Donald Trampın Hindistana artan təzyiqlərinin Rusiya neftinin qlobal bazarda daha da “kölgəyə çəkilməsinə” səbəb ola biləcəyini yazıb. Onun sözlərinə görə, əgər Hindistan Rusiya nefti idxalını azaltsa və ya tamamilə dayandırsa, bu, Moskvanın gəlirlərinə müəyyən mənfi təsir göstərə bilər, lakin əsas nəticə Rusiya neftinin daha geniş “kölgə bazarına” axması olacaq.
Enerji və Təmiz Hava Tədqiqatları Mərkəzinin məlumatına əsasən, sentyabr ayında Rusiyadan ixrac olunan xam neftin 69%-i dəniz nəqliyyatı ilə “kölgə donanması” vasitəsilə daşınıb. Bu sxem adətən neftin açıq okeanda gəmilər arasında birbaşa ötürülməsini, beləliklə də yükün mənşəyinin gizlədilməsini nəzərdə tutur.
Bussonun fikrincə, əvvəllər Hindistana birbaşa göndərilən Rusiya nefti indi eyni üsulla “kölgə bazarına” yönələcək. Bu halda yükün mənşə ölkəsi rəsmi sənədlərdə göstərilməyəcək və nəticədə həmin neft dolayısı ilə yenə də Hindistana və ya digər ölkələrə çata bilər.
Məqalədə qeyd olunur ki, Qərbin Rusiya neft sənayesinə qarşı təzyiq siyasəti hasilatın və ixracın azalmasına deyil, bazarın şəffaflığının daha da itirilməsinə gətirib çıxara bilər. “Nəticədə dünya neft bazarı daha qapalı və izlənməsi çətin bir sistemə çevriləcək,” – deyə Busso vurğulayıb.
Poliqon.info
