Vaşinqton və Boqota arasında gərginlik narkotiklərlə mübarizə mövzusunda dərinləşir...
Poliqon xəbər verir ki, ABŞ prezidenti Donald Tramp bazar günü Kolumbiyaya göstərilən yardımın azaldılacağını bəyan edib. O, ölkə prezidenti, solçu siyasətçi Qustavo Petronu “qanunsuz narkotacir” adlandıraraq onu narkotik ticarəti ilə mübarizədə uğursuz siyasət yürütməkdə ittiham edib.
Trampın açıqlaması Vaşinqtonla Boqota arasında münasibətlərdə yeni gərginlik mərhələsinə səbəb olub. ABŞ lideri bildirib ki, Kolumbiya hökumətinin narkotrafikə qarşı siyasəti “effektsiz və korrupsiyalaşmışdır” və bu səbəbdən maliyyə dəstəyi məhdudlaşdırılacaq.
Ekspertlər qeyd edirlər ki, Tramp administrasiyasının bu addımı iki ölkə arasındakı təhlükəsizlik və iqtisadi əməkdaşlığa mənfi təsir göstərə bilər. Kolumbiya isə cavabında bildirir ki, narkotiklərlə mübarizə “milli suverenlik məsələsidir” və Vaşinqtonun təzyiqləri “daxili işlərə müdaxilə” kimi qiymətləndirilir.
Qeyd edək ki, Qustavo Petro hakimiyyətə gəldikdən sonra narkotrafiklə mübarizədə zorakı üsulların azaldılmasını, daha çox sosial və iqtisadi proqramların tətbiqini dəstəkləyib. Bu yanaşma Vaşinqtonda ciddi narazılıq yaradıb.
Poliqon.info
