Ajans.az BBC-ə istinadən xəbər verir ki,hadisə yerli vaxtla saat 03:50 radələrində baş verib. Dubaydan uçan "Emirates" aviaşirkətinə məxsus EK9788 reysi eniş zamanı uçuş-enmə zolağından çıxaraq hava limanına məxsus patrul avtomobili ilə toqquşub. Nəticədə nəqliyyat vasitəsində olan iki əməkdaş həlak olub. Təyyarədə olan dörd ekipaj üzvü sağ-salamat xilas edilib. Rəsmilər bildiriblər ki, hadisə zamanı Boeing 747-481 tipli yük təyyarəsinin göyərtəsində yük olmayıb. Təyyarə "Emirates" aviaşirkəti tərəfindən Türkiyənin Act Airlines şirkətindən yaş (nəm) icarə əsasında istifadə olunurdu. Bu cür icarə modelində təyyarə ilə birlikdə ekipaj və sığorta da təmin edilir. Honq-Konq Beynəlxalq Hava Limanının əməliyyatlar üzrə icraçı direktoru Stiven Yiu hadisə ilə bağlı keçirdiyi mətbuat konfransında bildirib ki, patrul avtomobili uçuş-enmə zolağından kənarda, təhlükəsiz məsafədə hərəkətdə olub. Onun sözlərinə görə, təyyarə eniş zamanı düzgün trayektoriyadan çıxaraq hasara çırpılıb və patrul avtomobili ilə toqquşduqdan sonra onu dənizə itələyib. Cənab Yiu əlavə edib ki, avtomobil heç bir halda uçuş-enmə zolağına daxil olmayıb və təyyarənin belə bir trayektoriya üzrə hərəkət etməsi normal sayılmır. O, həmçinin bildirib ki, qəza zamanı təyyarədən heç bir təhlükə siqnalı daxil olmayıb. Hadisə nəticəsində həlak olan yer işçilərinin biri 30, digəri isə 41 yaşında olub. Onların hava limanında müvafiq olaraq 7 və 12 illik iş təcrübəsi var idi. Honq-Konq Nəqliyyat Bürosu başsağlığı verərək bildirib ki, bu itki ilə bağlı dərin kədər hissi keçirirlər və ailələrə lazımi dəstək göstəriləcək. Dalğıclar patrul maşınının qalıqları arasında cəsədləri dənizdən çıxarmağa nail olublar. Qəza nəticəsində təyyarə ciddi zədələnib – gövdəsi yarıya bölünüb, bir hissəsi suya batıb və gövdə üzərində böyük çatlar müşahidə olunub. Qəza zamanı ən azı bir fövqəladə evakuasiya sürüşməsi yerləşdirilib və ekipaj üzvləri təyyarəni təcili çıxış qapılarından tərk ediblər. Yanğınsöndürmə xidmətinin əməkdaşları hadisə yerinə cəmi iki dəqiqə ərzində çataraq ekipaj üzvlərini xilas ediblər. Səlahiyyətli qurumlar hadisənin səbəblərini araşdırmağa başlayıb. Hava limanı rəhbərliyi təyyarəyə düzgün təlimat verildiyini və zolaq boyunca lazımi nişanlamaların olduğunu bildirib. Bu qəza Honq-Konq Beynəlxalq Hava Limanında son illərin ən ciddi aviasiya hadisələrindən biri kimi qiymətləndirilir.
