ain.az, Bizimyol portalından verilən məlumatlara əsaslanaraq xəbər verir.
Azərbaycanda ərazisində, xüsusən də Bakı, Sumqayıt kimi böyük şəhərlərdə fəaliyyət göstərən ən böyük rəqəmsal xidmət təminatçılarından biri olan “KATV1” - “AG Telekom” MMC son vaxtlar abunəçilərinə problemlər yaradır.
Bu barədə Bizimyol.info xəbər portalına şirkətin həm internet, həm də televiziya yayım xidmətindən narazı qalan abunəçilər məlumat verib.
Paytaxtın Binəqədi rayonu, 9-cu mikrorayon ərazisində yaşayan Aytən Məmmədova bildirir ki, xeyli vaxtdır həm internet, həm də televiziya xidməti ilə bağlı ciddi problemlər var: “Oktyabrın 11-də səhər saatlarından axşama qədər nə internet oldu, nə də televiziya yayımı. Elə dövrdə yaşayırıq ki, uşaqların dərsləri, insanların işləri internetdən asılıdır. Şənbə günü idi, evdə istirahat edən insan ya televiza baxar, ya internetlə başını qatar. Bunların heç biri yox idi”.
Vətəndaşı ən çox narazı salan məqam isə şirkətlə heç cür əlaqə yarada bilməməkləri olub. Onun sözlərinə görə, “KaTV1” yalan məlumat yayır, abunəçilərini aldadır: “Şirkətin “Qaynar Xətt” nömrəsi “127”dir. Bu nömrəyə heç cür düşmək mümkün deyil, daim məşğul göstərir. 050 999 91 27 nömrəsini də Whatsapp nömrəsi kimi qeyd ediblər. Müraciət etmək istəyəndə məlum olur ki, bu nömrə ümumiyyətlə, “Whatsapp”da aktiv deyil. Bu, abunəçini aldatmaqdır, ələ salmaqdır. Abunəçi problemdən əziyyət çəkir, dərdini deməyə əlaqə vasitəsi də tapmır”.
Şikayətçinin sözlərinə görə, o, “Facebook” platformasının mesaj bölümündə narazılığını çatdırıb. Ona bildirilib ki, mikrorayon ərazisində qəza baş verib, bu səbəbdən həm internet, həm də televiziya yayımı kəsilib: “Nəhayət, sonradan “127” ilə də əlaqə saxlaya bildim. Oradan da operator qəza olduğunu dedi. Bildirdim ki, anlayışla qarşılayıram, hadisədir. Amma abunəçinin aldadılmasını başa düşə bilmirəm. Niyə şəbəkədə olmayan nömrəni sayta yerləşdirib, insanlar aldadılır? Normal şəkildə nömrə qoyulmalıdır, insanlar da lazım olanda zəng edib, mesaj yazıb, problemi desin, cavabını alsın. Dedilər ki, iradınızı çatdıracağıq”.
Oktyabrın 13-də KaTV1 abunəçiləri yenidən problemlərlə üzləşib. Onlar yenə də internetsiz qalıb. Əvvəlki günlərdə olduğu kimi, yenə də narazı vətəndaşlar şirkətlə əlaqə yaradıb, problemin səbəbini öyrənməkdə çətinlik çəkiblər. Çünki “127” daim məşğul olub, “Whatsapp” nömrəsi isə ümumiyyətlə, şəbəkədə olmayıb.
KaTV1-dən bildirilib ki, ərazidə ümumi nasazlıq var. Ərazidə işlər aparlır və probıemin qısa müddətdə aradan qaldırılması üçün addımlar atılır: “Müvəqqəti narahatçılıq üçün çox üzr istəyirik”.
Abunəçi bildirir ki, aylıq internet xidmətinə görə 18 manat, evdə iki televizorda yayıma görə isə KaTV1-ə 14 manat (ümumilikdə 32 manat) ödəyir.
Son günlər baş verənlərdən narazı qalan digər vətəndaş Nicat Əliyev əlavə edir ki, KaTV1 şirkəti bir sıra hallarda özbaşına qərarlarla da abunəçilərin hüquqlarını pozur: “Hansı kanal xoşuna gəlmirsə, onu paketdən çıxarır. Nəzərə almır ki, bu kanala abunəçilər vərdiş etmişdi, oradakı proqramlara daimi baxırdı. Yaxud da futbol kanalları paketdən çıxarıldı, onları əvəz eləmədilər. Bunlar abunəçinin hüquqlarının pozulmasıdır. Paketə dəyişiklik edilirsə, bundan abunəçinin xəbəri olmalıdır. Yoxsa biz bir də baxırıq ki, hansısa kanal artıq yoxdur”.
Bizimyol.info
Daha ətraflı məlumat və yeniliklər üçün ain.az saytını izləyin.
