Azərbaycanda əhalinin banklara borcu 27 milyard manatı keçib. Dövlət Statisika Komitəsinin cari ilin əvvəlinə olan məlumatına görə, ölkədə banklar tərəfindən ümumilikdə 27 milyard 477 milyon 656 min manat həcmində kredit verilib. Bu göstəriciyə əsasən, adambaşına düşən kredit məbləği 2 min 687 manat təşkil edir. Verilən kreditlərin böyük hissəsi isə paytaxtın payına düşür. Bakıda banklar tərəfindən 21 milyard 35,3 milyon manat kredit verilib. Beləliklə, paytaxtda hər bir sakinə orta hesabla 8 min 948 manat kredit düşür.
Mövzu ilə bağlı “Yeni Sabah”a danışan sabiq maliyyə naziri, professor Fikrət Yusifov deyib ki, ölkə üzrə ümumi kredit qoyluşunda qeydə alınan artımın 78,3 faizi ev təsərrüfatlarına verilən kreditlərdəki artımla bağlıdır:
“Cari ilin 8 ayında ölkə üzrə kreditlərin ümumi həcmi 30 milyard 464 milyon manat olub. Bu ötən ilin 8 ayı ilə müqayisədə ümumi kredit qoyluşunun 10,2% və ya 2 milyard 815 milyon manat artması deməkdir. Müqayisə apardığımız dövrdə ev təsərrüfatlarına verilən kreditlərin həcmi 15 milyard 998 milyon manatdan 18 milyard 202 milyon manata qədər artıb. Daha doğrusu bu kreditlərin həcmi bir il ərzində 2 milyard 204 milyon manat və ya 13,8% çoxalıb”.
Professor qeyd edib ki, hazırda kredit bazarında mənzərə heç də ürəkaçan deyil. Onun sözlərinə görə, cari ilin 8 ayı ərzində vaxtı keçmiş kreditlərin həcmi də ötən ilin 8 ayı ilə müqayisədə 12,2% və ya 57,8 milyon manat artıb: “Bu faktlar kredit bazarında mənzərənin o qədər də ürəkaçan olmadığından xəbər verir. Əgər ümumi kredit qoyuluşunda bir il ərzində baş vermiş artımın 78,3%-i istehlak kreditlərinin artımının hesabına baş verirsə, bu heç də yaxşı ənənə deyil. Biz bu artımları real iqtisadiyyata, onun onurğa sütununu təşkil edən kiçik və orta biznes müəssisələrinə verilən kreditlərdə görmək istərdik”.
Nazim Hacıyev
Telegram kanalımız
