Türkiyə Ali Təhsil Şurası (YÖK) universitetlərdə bakalavr təhsilinin 4 ildən 3 ilə endirilməsi istiqamətində yeni islahat planını açıqlayıb.
Milli.Az xəbər verir ki, YÖK sədri Prof. Dr. Erol Özvar "Türkiyə Yüksək Təhsilin 2030 Yol Xəritəsi" çərçivəsində təqdim etdiyi dəyişiklikdə müvəffəqiyyətli tələbələrin bakalavr təhsilini 3 il ərzində başa vurmaq imkanına sahib olacağını bildirib.
Yeni sistemin məqsədi Avropa təhsil standartlarına uyğunlaşmaq, kurs proqramlarını sadələşdirmək və tələbələri daha gənc yaşda əmək bazarına cəlb etməkdir.
YÖK-ün açıqlamasına görə, 3 ilə məzun olmaq hüququ yalnız yüksək akademik göstəriciləri olan tələbələrə şamil ediləcək. Belə ki, ən azı 3.00/4.00 orta balı qoruyan, kursları təkrar etməyən və proqram tələblərini vaxtından əvvəl tamamlayan tələbələr bu imkandan yararlana biləcəklər.
Hazırda plan mühəndislik, sosial elmlər və biznes fakültələrində tətbiq edilməyə hazırlanır. Tibb və stomatologiya kimi praktiki ixtisaslar isə bu proqramdan kənarda qalacaq.
Bu islahatın məqsədi Türkiyə ali təhsil sistemini beynəlxalq standartlara uyğunlaşdırmaq və təhsildə çevikliyi artırmaqdır.
Milli.Az
