Samsung üç hissəyə qatlanan və üç ayrı batareyaya sahib smartfon təqdim etməyə hazırlaşır. Bu barədə ixtisaslaşmış Galaxy Club nəşri məlumat verib.
Media nümayəndələri xatırladıb ki, son vaxtlar internetdə Samsung-un üç hissəyə qatlanan ilk smartfonunu təqdim etməyə hazırlaşdığı ilə bağlı söz-söhbətlər dolaşır. Həmçinin Koreya Patent İdarəsi KIPRIS-in bazasında oxşar dizayna malik telefonun təsviri də aşkar olunub.
Məlumata görə, IT-şirkət cihazı üç hissədən ibarət hazırladığı üçün böyük batareya üç seqmentə bölünəcək. Formal olaraq yeni qatlanan cihaz üç batareya ilə təchiz olunacaq ki, bunlar bir-biri ilə əlaqələndiriləcək. Hər üç batareyanın tutumu fərqli olacaq, lakin smartfonun ümumi batareya tutumu sənəddə göstərilməyib.
Jurnalistlər qeyd ediblər ki, əgər Galaxy Z Fold 7-nin batareya tutumunun iki batareya istifadə edilərkən 4400 milliamper-saat olduğunu qəbul etsək, Z Trifold-un üç batareyası ilə bu göstəricinin asanlıqla 5000 milliamper-saatı keçməsi mümkündür.
Açıq məlumatlara görə, Samsung-un təqdim edəcəyi telefon iki menteşəyə malik olacaq — geniş və dar. Bu dizayn cihazın içəriyə səliqəli şəkildə qatlanmasına imkan verəcək. Üç batareya ilə smartfon üçün patent 30 sentyabr 2025-ci il tarixində təqdim olunub.
Əvvəlki məlumatlara görə, Samsung üç hissəyə qatlanan ilk smartfonu oktyabr ayında təqdim edəcək. Anons isə Asiya-Sakit Okean İqtisadi Əməkdaşlıq (APEC) sammitinin başlanğıcına təsadüf edəcək.
