Vaşinqtonda avqustun 8-də Azərbaycanın Ermənistanla imzaladığı Birgə Bəyannamə Türk xalqlarının zəfəridir.
Bunu Özbəkistan Prezidenti Şavkat Mirziyoyev oktyabrın 7-də Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə görüşündə çıxışı zamanı bildirib.
Şavkat Mirziyoyev qeyd edib ki, "bu tarixi sənəd iqtisadi, ticari, nəqliyyat kimi sahələrdə əməkdaşlıq imkanları təqdim edir".
Özbəkistan Prezidenti eyni zamanda Şuşa, Xankəndi və Ağdam şəhərlərindəki qısa müddətdə əldə edilən irəliləyişdən böyük məmnunluq ifadə edib.
"Vaşinqtonda avqustun 8-də Azərbaycanın Ermənistanla imzaladığı Birgə Bəyannamə, türk dünyası üçün həm siyasi, həm də simvolik zəfərdir", - bunu Sonxeber.az -a açıqlama verən politoloq Tural İsmayılov deyib:
"Özbəkistan Prezidenti Şavkat Mirziyoyevin Qəbələdəki çıxışı bunu bir daha təsdiqləyir. Sənəd təkcə tərəflər arasında sülhün təmin olunmasını deyil, həm də iqtisadi və ticari əməkdaşlıq üçün yeni imkanlar açır. Nəqliyyat dəhlizlərinin fəaliyyətə başlaması regionun inkişaf perspektivlərini xeyli genişləndirir. Bu bəyannamə türk dövlətlərinin birliyinin praktik nəticəsi kimi də qiymətləndirilə bilər. Şuşa, Xankəndi və Ağdamda qısa müddətdə əldə edilən irəliləyişlər Azərbaycanın sürətli və effektiv diplomatiya yürütmə qabiliyyətini göstərir.
Azərbaycanın liderliyi altında regionda dayanıqlı sülh və əməkdaşlıq modeli formalaşır. Bu sənəd həm də Azərbaycan diplomatiyasının uğurudur, çünki real nəticələr ortaya qoyub. Türk dövlətləri üçün bu, ideya səviyyəsindən əməli fəaliyyətə keçidin nümunəsidir. Özbəkistanın məmnunluğu, türk dünyasının ortaq maraqlarının uğurla irəlilədiyini göstərir. Azərbaycan iqtisadi mədəni və nəqliyyat sahələrində regionun liderinə çevrilir. Bu uğur həmçinin bölgədə digər dövlətlər üçün də sülh və əməkdaşlıq mesajıdır. Birgə Bəyannamə türk dövlətlərinin birgə gücünün və diplomatik iradəsinin göstəricisidir. Azərbaycan regionda nüfuzunu artırmaqla yanaşı, geosiyasi sabitliyin də təminatçısına çevrilir. Nəticədə bu sənəd yalnız tərəflər üçün deyil, bütün türk dünyası üçün qələbədir".
