ABŞ administrasiyası hərbi eskalasiyaya hazırlaşa bilər...
Poliqon xəbər verir ki, The New York Times qəzetinin məlumatına görə, ABŞ prezidenti Donald Tramp Venesuela ilə diplomatik razılaşma əldə etmək cəhdlərini dayandırıb. Qəzet yazır ki, bu addım narkotik ticarəti ilə əlaqəli qüvvələrə və ya Venesuela hökumətinə qarşı mümkün hərbi eskalasiyanın yolunu aça bilər.
Məlumata əsasən, ABŞ prezidentinin xüsusi nümayəndəsi və Kennedi Mərkəzinin icraçı direktoru Riçard Qrenell Venesuela prezidenti Nikolas Maduro və digər yüksək rütbəli Venesuela rəsmiləri ilə bir sıra danışıqlar aparırdı. Lakin ötən cümə axşamı Tramp ABŞ-ın ali hərbi rəhbərliyi ilə keçirilən görüş zamanı Qrenellə telefonla əlaqə saxlayaraq ona bütün diplomatik təmasları, o cümlədən Maduro ilə danışıqları dərhal dayandırmaq göstərişi verib.
ABŞ rəsmiləri bildiriblər ki, Tramp administrasiyası vəziyyətin gərginləşəcəyi təqdirdə həyata keçirilə biləcək bir neçə hərbi plan hazırlayıb. Həmin planların bir hissəsi Venesuela lideri Nikolas Maduronun hakimiyyətdən uzaqlaşdırılmasına yönəlmiş əməliyyatları da əhatə edə bilər.
Qeyd olunur ki, son aylarda ABŞ və Venesuela arasında gizli diplomatik kanallar vasitəsilə bir sıra təmaslar olsa da, Trampın son qərarı bu dialoqun tamamilə bağlandığını göstərir. Ekspertlər hesab edirlər ki, bu addım regionda gərginliyi daha da artıracaq və Vaşinqtonun Cənubi Amerikada nüfuz mübarizəsini yeni mərhələyə daşıyacaq.
Poliqon.info
