Son günlər ictimai nəqliyyatda qiymət artımı ilə bağlı verilən qərar cəmiyyətdə geniş rezonans doğurdu. Artan narazılıqlar fonunda bir çox suallar cavabsız qalır: Bu artım nəyə xidmət edir? İctimai nəqliyyatın keyfiyyəti yüksələcəkmi? Və ən əsası — Yerüstü Nəqliyyat Agentliyi (AYNA) bu qiymət artımına qarşılıq olaraq hansı işləri görüb?
İqtisadi əsaslandırmalar adı altında ictimai nəqliyyatda tariflərin artırılması AYNA tərəfindən “zəruri addım” kimi təqdim edildi. Agentlik rəsmiləri bildirdi ki, bu artım yeni avtobusların alınması, xidmət keyfiyyətinin artırılması və intervalların azaldılması məqsədi daşıyır. Lakin qiymət artımından sonra artıq bir neçə gün keçsə də, AYNA tərəfindən ictimaiyyətə təqdim olunmuş konkret bir konsepsiya yoxdur.
Əksinə, Bakı Metropoliteni qiymət artımından dərhal sonra operativ şəkildə addım atdı: yeni konsepsiya təqdim etdi, intervallar azaldıldı, sərnişin axınının sıx olduğu saatlarda qatarların hərəkət qrafiki optimallaşdırıldı. AYNA isə hələ də təklif, plan və ya konkret icra göstəriciləri açıqlamayıb.
Azərbaycan Respublikası Dövlət Statistika Komitəsinin məlumatına görə, 2024-cü ilin son rübündə gündəlik Bakı şəhərində orta hesabla 1,2 milyon insan ictimai nəqliyyatdan istifadə edirdi. Qiymət artımından sonra bu göstəricidə 5-8% azalma müşahidə olunub. Bu isə onu göstərir ki, qiymət artımı ictimai nəqliyyata keçidi təşviq etmək əvəzinə, əks effekt verib – insanlar yenidən şəxsi avtomobillərə üstünlük verirlər. Bu isə şəhərdə tıxac və hava çirklənməsi problemini daha da dərinləşdirir.
Ekspertlər bildirirlər ki, ictimai nəqliyyatın inkişafı üçün ilk növbədə təhlükəsizlik, rahatlıq, dəqiqlik və əlçatanlıq kimi meyarlar artırılmalı idi. Qiymət artımı isə bu problemlərin heç birini həll etmədi, əksinə, ictimai narazılığı artırdı.
Son günlər sosial şəbəkələrdə və bəzi yerli mediada AYNA rəhbərliyinin fəaliyyəti ilə bağlı tənqidlər daha da artıb. Agentlik rəhbərinin şəxsi əmlakları, xüsusilə lüks villa alışı ilə bağlı yayılan məlumatlar cəmiyyətdə ciddi suallar doğurur. Mətbuat yazır ki, AYNA rəhbəri vəzifədə olduğu müddətdə milyonlarla manatlıq əmlak əldə edib, lakin agentliyin balansında olan nəqliyyat vasitələrinin yaşı 10 ili ötüb.
AYNA rəhbərinin şübhəli villa əməliyyatı — Dövlətin düşməninə 1 milyon verib?
yapikredi.com.az
GÜNDƏM 22 sentyabr 2025, 13:29
Adnan Əhmədzadənin həbsi bir çox layları tərpədib. Gizli-aşkar oliqarxları hədəfə çıxarıb. Yəqin istintaq bu işdə müəyyən araşdırmalar aparır. Üstəlik media da boş dayanmır, bəzi həssas nöqtələrə yoxlama “zərbələri” endirir.
Belə ki, Demokrat.az-ın yazdığına görə, Anar Rzayev “Akkord İnşaat Sənaye” ASC-nin keçmiş sahibi, hazırda axtarışda olan və dələduzluqda ittiham edilən iş adamı İlqar Hacıyevin villasını 1 milyona alıb:
“1 milyon manatın 300 min manatı metronun “Gənclik” stansiyası ərazində yeni inşa olunmuş çoxmərtəbəli yaşayış binasında yerləşən mənzillə əvəzləşdirilib, 700 min manatı isə nağd ödəniləcək. Artıq Anar Rzayevin adamları tərəfindən həmin villaya baxış da keçirilib”.
Bu, olduqca ciddi məsələ olmaqla yanaşı, AYNA rəhbərində bu qədər vəsaitin haradan olması sualını da aktuallaşdırır. Şübhələri artıran digər məqam AYNA-nın bu xəbərə rəsmi şəkildə aydınlıq gətirməməsidir. İlqar Əliyev Azərbaycan dövlətinə qarşı qərəzli və düşməncə mövqeyi ilə tanınır. AYNA rəhbərinin belə bir adamla alverə girməsi olduqca riskli görünür. Bəs Anar Rzayevi bu qədər cəsarətləndirən hansı səbəblərdir.
AYNA-nın rəsmi saytında və ictimai hesabatlarında isə nə maliyyə şəffaflığı, nə də yeni texnika alınması ilə bağlı planlar yer alır. Bu isə ictimai vəsaitlərin hara xərcləndiyi ilə bağlı şübhələri artırır.
AYNA-nın əsas funksiyası şəhərin yerüstü nəqliyyat sistemini modernləşdirmək, avtobus parkını yeniləmək və sərnişindaşıma xidmətinin keyfiyyətini yüksəltməkdir. Lakin bu funksiyalar üzrə son illərdə ciddi dəyişiklik və ya inkişaf qeydə alınmayıb. Ekspertlər bildirir ki:
2021–2025-ci illər üçün AYNA-nın strateji planı ictimaiyyətə açıqlanmayıb.
Yeni avtobusların alınması və ya elektrik nəqliyyatı ilə bağlı real addımlar atılmayıb.
Sərnişin məmnunluğu ilə bağlı ictimai rəy sorğuları keçirilmir.
Qiymət artımı qarşılığında xidmət keyfiyyətində heç bir nəzərəçarpacaq irəliləyiş yoxdur.
Qiymət artımı ilə yanaşı, ictimaiyyət aidiyyəti qurumlardan hesabat və şəffaflıq gözləyir. AYNA isə hələlik nə mətbuata, nə də cəmiyyətə bu sualların cavabını verib. İctimai nəqliyyatın inkişafı üçün təkcə qiymət artımı kifayət etmir. Burada sistemli planlama, şəffaf idarəetmə və real icra mexanizmləri əsas rol oynamalıdır.
AYNA rəhbərliyi bu tənqidlərə cavab verəcəkmi? Yeni konsepsiyalar nə zaman açıqlanacaq? Qiymət artımının əvəzində cəmiyyət nə qazanacaq? Bu suallar hələ açıq qalır.
