BAKI, 7 oktyabr. TELEQRAF
ABŞ tərəfindən dəstəklənən PKK terror təşkilatının ən böyük qolu SDQ (Suriya Demokratik Qüvvələri) ilə Dəməşq arasında imzalanan razılaşma üzrə verilən müddətin başa çatmasına 2,5 ay qalır. Amma YPG/SDQ İsrailin də dəstəyi ilə silahlarını təhvil verib Suriya ordusuna inteqrasiya olmağa yanaşmır.
Teleqraf xəbər verir ki, bu barədə “Türkiyə” qəzeti məlumat yayıb.
Sona doğru yaxınlaşarkən Suriya hökumətinin terrorla mübarizə istiqamətində atacağı addımlar maraqla gözlənildiyi bir vaxtda, sabah Türkiyə xarici işlər naziri Hakan Fidan Ankarada suriyalı həmkarı Əsəd Şibani ilə görüşəcək. məlumata görə, nazirlər YPG-nin inteqrasiya prosesi ilə bağlı son vəziyyəti, İŞİD başda olmaqla terrorla mübarizə məsələlərini, İsrailin Suriyaya yönəlmiş hücumlarını, druz məsələsini və həftəsonu keçirilmiş seçkiləri müzakirə edəcək.
Mənbə əlavə edib ki, YPG/SDQ Dəməşqlə imzaladığı razılaşmaya xəyanət edərsə, Türkiyə Suriyaya hər cür dəstək göstərəcək.
Nəşr bildirib ki, Bəşər Əsəd rejiminin devrilməsindən sonra Suriyanın ərazi bütövlüyü və suverenliyi məsələsində həssaslığını qoruyan Ankara bu ölkə üçün sabitlik yaradan təsirini göstərməyə davam edir:
“Türkiyə vurğulayır ki, Suriyanın fiziki bütövlüyünə və birliyinə təhdid yaradan, ölkəni parçalamağa çalışan bütün qüvvələr aradan qaldırılmalıdır. Ankara bildirir ki, YPG artıq açıq şəkildə niyyətini ortaya qoymalı və Dəməşqlə imzaladığı razılaşmaya əməl etməlidir. Xüsusilə druz məsələsinin hər iki tərəf üçün qəbuledilən və ölkənin bütövlüyünü təhlükəyə atmayan bir perspektivdə həll edilməsinin vacibliyi qeyd olunur. Türkiyənin liderlik gücü və diplomatik dərinliyinin bu problemləri idarə etməyə kifayət edəcəyi deyilir.
Müdafiə Nazirliyinin mənbələri bildiriblər ki, SDG terror təşkilatının tərksilah olunmaması və Suriya dövlətinə inteqrasiya ilə bağlı öhdəliklərini yerinə yetirməməsi həm Suriyanın birliyinə və bütövlüyünə, həm də Türkiyənin milli təhlükəsizliyinə təhdid yaradır. Mənbələr vurğulayıblar ki, Türkiyənin bu məsələdəki mövqeyi açıqdır və SDQ-nin prosesi sabotaj etməsinə icazə verilməyəcək. Dəməşqlə əməkdaşlıq çərçivəsində terrorla mübarizə qətiyyətlə davam etdiriləcək.
Türkiyə tərəfi qeyd edib ki, Suriyanın siyasi birliyi və ərazi bütövlüyünə zərər verə biləcək bütün hərəkət və bəyanatlardan çəkinmək lazımdır və lazım gəldikdə Türkiyə həm öz təhlükəsizliyi, həm də Suriyanın sabitliyinə töhfə vermək üçün bu ölkəyə hər cür dəstək göstərəcək”.
