Estetik əməliyyatı uğursuz alınarsa, pasiyent pulunu tələb edə biləcək?

Türkiyə məhkəmələrinin son qərarlarına əsasən, burun və digər estetik əməliyyatlar artıq “əsər” sayılır. Yəni, əməliyyatı həyata keçirən həkimin əl işi pasiyent gözləntilərinə cavab verməsə, vətəndaş məhkəməyə müraciət edərək ödədiyi pulu geri tələb edə bilər. Azərbaycanda da estetik əməliyyatlar kifayət qədər geniş yayılıb.

Hüquqşünas Günay Əliyeva Demokrat.az-a açıqlamasında deyib ki, Azərbaycanda estetik əməliyyatlarla bağlı hüquqi tənzimləmələr əsasən “İcbari Tibbi Sığorta haqqında” qanun, “Əhalinin sağlamlığının qorunması haqqında” qanun və digər normativ aktlarla müəyyən olunur:

“Lakin xüsusi olaraq estetik əməliyyatlara dair ayrıca bir qanun yoxdur. Bu o deməkdir ki, estetik əməliyyatlar daha çox ümumi tibbi xidmətlər çərçivəsində qiymətləndirilir. Əsas qayda həkim və pasiyent arasında bağlanan müqavilə və pasiyentin yazılı razılıq sənədidir.

Pasiyent əməliyyatın riskləri barədə əvvəlcədən məlumatlandırılmalı, tibbi sənədlər imzalanmalıdır. Əgər həkim tibbi standartlara əməl etməzsə və nəticədə pasiyentdə sağlamlıq problemləri yaranarsa, məsuliyyət həm mülki, həm də cinayət qanunvericiliyi ilə müəyyən edilir. Lakin estetik əməliyyatların nəticəsi “gözlənti ilə reallıq” arasında fərq olduqda, pasiyentin hüquqlarını qorumaq bəzən çətinləşir. Çünki qanunvericilikdə “gözəllik nəticəsi” deyil, yalnız tibbi səhv və ya səhlənkarlıq əsas götürülür”.

Hüquqşünas qeyd edib ki, bu isə müəyyən boşluq yaradır:

“Məsələn, pasiyent nəticədən narazı qaldıqda, yalnız həkimin tibbi səhvini sübuta yetirə bildikdə kompensasiya tələb edə bilər. Halbuki Türkiyədə olduğu kimi estetik əməliyyatların “əsər” kimi qiymətləndirilməsi pasiyentlərin hüquqlarını daha geniş qoruyur.

Azərbaycanda belə bir mexanizmin tətbiqi həm pasiyentlər, həm də həkimlər üçün hüquqi aydınlıq yaradardı. Ölkəmizdə estetik əməliyyatlarla bağlı normativ bazanın təkmilləşdirilməsinə ehtiyac var. Bu sahədə mübahisələr məhkəmələrdə çox vaxt pasiyentlərin xeyrinə həll olunmur. Türkiyədəki təcrübə Azərbaycanda da hüquqi islahatlar üçün nümunə ola bilər”.

Leyla Turan
Demokrat.az

Estetik əməliyyatı uğursuz alınarsa, pasiyent pulunu tələb edə biləcək? — AÇIQLAMA

Hesaba daxil ol

Qeydiyyatdan keç

Şifrəni bərpa et