İran və Azərbaycan arasında Araz çayı üzərində hidrometrik və monitorinq stansiyalarının tikintisi ilə bağlı birgə əməkdaşlıq iclası keçirilib.
Görüş Mil-Muğan ərazisində, sərhəd yaxınlığında yerləşən bəndlərdə baş tutub. Tərəflər Araz Daimi Birgə Komissiyasının razılaşmaları əsasında çayın su ehtiyatlarının daha dəqiq və təhlükəsiz idarə olunması üçün texniki infrastrukturun təkmilləşdirilməsinə dair razılıq əldə ediblər.
İclas zamanı hidrometrik stansiyaların konkret yerləşdirilməsi, tələb olunan avadanlıqlar, beynəlxalq məlumat mübadiləsi və birgə istismar mexanizmləri ətrafında müzakirələr aparılıb. Görüşün nəticəsi olaraq, bu sahədə əməkdaşlığın genişləndirilməsi və texniki imkanların gücləndirilməsi istiqamətində konkret addımların atılması planlaşdırılıb.
Bu təşəbbüs, Araz çayının transsərhəd su ehtiyatı kimi strateji əhəmiyyətini nəzərə alaraq, elmi və texniki məlumatların mübadiləsinə əsaslanan ilk əməkdaşlıq mərhələsi kimi qiymətləndirilir.
Layihənin həyata keçirilməsi su ehtiyatlarının səmərəli idarə olunması, daşqınların qarşısının alınması və hövzəyə nəzarət baxımından mühüm rol oynaya bilər.
