Ötən gün həbsdən qaçaraq Ermənistanın Sankt-Peterburqdakı Baş Konsulluğunda gizlənən və Qarabağda ləğv edilmiş qondarma rejimin “Daxili İşlər Nazirliyinin Dövlət Fövqəladə Hallar Xidməti”nin keçmiş direktor müavini Boris Avaqyan intihar edib.
“Cebheinfo.az”-ın məlumatına görə, bu barədə Rusiya mediası xəbər yayıb.
Qeyd edilir ki, sentyabrın 24-də səhər saatlarında Sankt-Peterburqun Vasilyevski adasındakı Ermənistan konsulluğunun tualetində 43 yaşlı Ermənistan vətəndaşı Boris Avaqyan ölü tapılıb. Bir gün əvvəl o, həbs olunacağı məhkəmədən qaçaraq konsulluqda gizlənib. Məhkəmənin Avaqyan barəsində gömrükdən yayınma maddəsi ilə həbs qətimkan tədbiri seçəcəyi gözlənilirdi.
Həmin gecə o, özünü diplomatik nümayəndəliyin tualetinə bağlayıb və konsulluq işçilərinin tələblərinə baxmayaraq çölə çıxmayıb. Səhər diplomatlar onun ekstradisiyası ilə bağlı Rusiya Xarici İşlər Nazirliyinin nümayəndələri ilə danışıqlar aparıblar. Nəhayət, Avakyan tualetin qapısının arxasından cavab verməyi dayandırdıqda, onu zorla açmaq lazım gəlib. Bu zaman içəridə onun cəsədi aşkar edilib.
Qeyd edək ki, Boris Avakyan 2010-cu ildə Federal Əmlakın İdarə Edilməsi Agentliyinin Leninqrad vilayəti üzrə ofisinin rəis müavini vəzifəsində çalışıb. 2014-cü ildən Sankt-Peterburq şəhərinin torpaqdan istifadə və mühafizə üzrə baş dövlət müfəttişinin müavini, daha sonra isə dövlət torpaq nəzarəti idarəsinin rəis müavini olub.
2024-cü ilin aprelindən Avakyan və daha bir neçə nəfər barəsində ittiham aktı üzrə iş məhkəməyə verilib. İşdə ümumilikdə 21 nəfər iştirak edir. Bu il avqustun 22-də cavabdeh Müdafiə Nazirliyi ilə müqavilə bağlayıb. Onun işi dayandırılıb və Avakyan həbsdən azad edilib.
“Bu gün Avakyanın Ukraynada müharibəyə getməkdən imtina etməsi ilə əlaqədar bu müqaviləyə xitam verilməsi ilə əlaqədar işin bərpası ilə bağlı vəsatət qaldırılıb. Məhkəmə iclasında həbs qətimkan tədbiri ilə bağlı məsələ də baxılıb. Məhkəmə qərardad çıxarmaq üçün müşavirə otağına gedib.
Bu müddət ərzində Avakyan məhkəməni tərk edib və o, daha sonra məhkəməyə müraciət etməyib. Məhkəmə işin bərpasına və təqsirləndirilən şəxsin həbsinə qərar verib”, - deyə o bildirib. Qaçaraq konsulluqda gizlənmiş Avakyan orada intihar edib.
