İspaniya Baş naziri Pedro Sançesin qardaşı David Sançes, 2017-ci ildəki təyinat zamanı inzibati pozuntu etməkdə və baş nazir olan qardaşının nüfuzundan istifadə etməkdə ittiham olunur.
"Cebheinfo.az" xəbər verir ki, İspaniyanın cənub-qərbində yerləşən Badaxos şəhərindəki Şəhər Məhkəməsi, David Sançes barəsində hazırlanan ittiham aktına “ehtimala əsaslanır” səbəbilə edilən etirazı rədd edərək onun məhkəmə qarşısına çıxarılmasına qərar verib.
Məhkəmə Baş nazirin qardaşı David Sançesin 2017-ci ildə Badaxos Şəhər Şurası tərəfindən Musiqi Konservatoriyalarının Fəaliyyətləri üzrə Koordinator vəzifəsinə təyin olunduğu dövrdə inzibati pozuntu və qardaşının siyasi nüfuzundan istifadə etdiyi iddiaları ilə bağlı məhkəmə araşdırmasının davam etməsinə qərar verib.
Qərarda qeyd olunub: “İddia edilən hərəkətin cinayət xarakteri daşıdığına dair kifayət qədər sübut mövcuddur və bu səbəbdən məhkəmə prosesi davam etməlidir”.
Eyni iş üzrə yalnız David Sançes deyil, Baş nazir Sançesin Baş katibi olduğu Sosialist İşçi Partiyasının (PSOE) Ekstremadura muxtar bölgəsinin lideri Migel Anxel Qayardo da daxil olmaqla ümumilikdə 10 nəfər təqsirləndirilən şəxs var.
Digər tərəfdən, İspaniya Baş naziri Pedro Sançesin həyat yoldaşı Beqona Qomes barəsində də hüquqi proses davam edir.
İki ifrat sağçı təşkilat və daha sonra Vox Partiyasının da qoşulduğu bir şikayət əsasında, həyat yoldaşının nüfuzundan istifadə edərək işlədiyi universitetdə bir iş adamının işə götürülməsinə vasitəçilik etdiyi iddia olunan Beqona Qomes barəsində 5 aprel 2024-cü ildə başlanan istintaq hələ də davam edir.
