140 il əvvəl batmış “xəyal gəmisinin” qalıqları tapılıb
Ajans.az xəbər verir ki,bu barədə Associated Press məlumat yayıb. “F.J. King” adlı gəminin qalıqları kəşfiyyatçı Brandon Bylodun rəhbərlik etdiyi tədqiqat qrupu tərəfindən sonar cihazı vasitəsilə tapılıb. Bylodun sözlərinə görə, gəminin korpusu bütöv vəziyyətdə qalıb. “Bəzilərimiz bir-birimizi çimdikləməli olduq – onu bu qədər tez və bu vəziyyətdə tapacağımıza inanmırdıq”, – deyə o bildirib. Qeyd olunur ki, 1970-ci illərdən bəri “F.J. King” gəmisinin tapılması üçün cəhdlər davam edirdi. Gəminin batdığı yer barədə ziddiyyətli məlumatlar ekspedisiyalara maneə törədib. Gəminin kapitanı Uilyam Qriffin onun Beyli Harbordan təxminən 8 kilometr aralıda batdığını desə də, mayak gözətçisi gəmini sahilə daha yaxın məsafədə gördüyünü iddia etmişdi. Uzun illər ərzində nə balıqçılar, nə də xəzinə ovçuları onun izinə düşə bilməyiblər. Buna görə də “F.J. King” gəmisinə tez-tez “xəyal gəmisi” adı verilib.
