Ajans.az The New York Times-a istinadən xəbər verir ki,onun həbsi sabiq prezident Yun Seok-yula qarşı impiçment prosesi ilə bağlı aparılan istintaq çərçivəsində həyata keçirilib. Hüquq-mühafizə orqanları bildirir ki, dini təşkilatın yaradıcısı Sun Myung Munun 82 yaşlı dul qadını — Han Hak-ca, icmanın vəsaitlərini mənimsəməkdə və bu pullardan Cənubi Koreyanın birinci xanımı Kim Geun-hee-yə rüşvət vermək məqsədilə istifadə etməkdə ittiham olunur. İddialara əsasən, bu yolla Birlik Kilsəsi dövlət səviyyəsində güzəştli münasibət əldə edib. Qeyd edək ki, 2024-cü ilin dekabrında o zamankı prezident Yun Seok-yul ölkədə hərbi vəziyyət elan etmişdi. Bu addımdan sonra prokurorlar onu iğtişaşların təşkili və konstitusion quruluşu pozmaqda ittiham etmiş, nəticədə Yun Seok-yul həbs olunmuşdu. 2025-ci ilin aprelində isə Cənubi Koreya Konstitusiya Məhkəməsi Yun Seok-yulun impiçmentini təsdiqləyərək onu bütün dövlət səlahiyyətlərindən məhrum edib.
