Kopenhagendə və Osloda hava məkanı bağlanandan sonra yenidən açılıb...
Poliqon xəbər verir ki, Danimarka və Norveç hüquq-mühafizə orqanları Kopenhagen və Oslo hava limanlarının üzərində müşahidə edilən pilotsuz uçuş aparatları (PUA) ilə bağlı birgə araşdırmaya başlayıblar. Reuters-in məlumatına görə, insident səbəbindən hər iki şəhərdə hava məkanı müvəqqəti bağlansa da, artıq yenidən fəaliyyətə açılıb.
Kopenhagen polisi açıqlamasında bildirib ki, PUA-ların mənşəyi və kimə məxsus olduğu hələlik müəyyənləşdirilməyib. “Polis intensiv araşdırmaya başlayıb ki, bu pilotsuz aparatların haradan və kim tərəfindən idarə edildiyini müəyyən etsin. Aparatlar yoxa çıxıb və biz onlardan heç birini ələ keçirə bilməmişik”, – deyə Kopenhagen polisinin komissar köməkçisinin müavini Yakob Hansen jurnalistlərə açıqlama verib.
Rəsmi məlumata görə, Norveçin Oslo hava limanında hava məkanı yerli vaxtla saat 03:22-də (Bakı vaxtı ilə 04:22) açılıb. Danimarkanın Kopenhagen aeroportunda isə hava məkanı saat 00:30-da (Bakı vaxtı ilə 01:30) yenidən fəaliyyətə başlayıb.
Hadisənin səbəbləri və PUA-ların mənşəyi barədə dəqiq nəticələrin əldə olunması üçün araşdırmalar davam edir. Mütəxəssislər belə insidentlərin hava nəqliyyatının təhlükəsizliyinə ciddi təhdid yarada biləcəyini bildirirlər.
Poliqon.info
